40 mijë apartamente bosh dhe çmime të papërballueshme, Berisha: Çiftet e reja po ikin nga Tirana

Kreu i PD-së, Sali Berisha, ka ngritur akuza lidhur me tregun e pasurive të paluajtshme në Tiranë dhe Durrës. Përmes një video të postuar në Facebook, Berisha pretendon se mbi 40 mijë apartamente janë të boshatisura, ndërsa mijëra familje të reja përballen me vështirësi për të siguruar banesën e parë.

Sipas Berishës, çmimet e larta të apartamenteve dhe pamundësia për të përballuar blerjen e një banese po i detyrojnë çiftet e reja të largohen nga Tirana. Ai pretendon gjithashtu se rreth 120 mijë familje në Tiranë dhe Durrës janë në pritje të një shtëpie të parë dhe paralajmëron se një pjesë e tyre mund të zgjedhë emigrimin.

”Mbi 40 mijë apartamante bosh, çiftet e reja ikin nga Tirana se Rama kërkon të pastrojë paratë e drogës në ndërtim. 120 mijë familje në Tiranë e Durrës në pritje të shtëpisë së parë rrezikojnë të braktisin vendin. Protesta përballë spekulantit imobiliar e vetmja rrugë”,-shkruan Berisha.

Çështja e apartamenteve bosh dhe e përballueshmërisë së banesave është dokumentuar edhe në analiza të tjera. Një dokument i publikuar nga IKESH, duke iu referuar të dhënave të INSTAT dhe një analize të BIRN, thekson se në Shqipëri ka rreth 1.08 milionë banesa dhe 756 mijë familje, ndërsa raporti evidenton një numër të konsiderueshëm banesash bosh.

Bashkia e Tiranës ka raportuar kërkesë të lartë për programet sociale të strehimit. Në një dokument zyrtar të vitit 2025 thuhet se mijëra individë dhe familje kanë aplikuar për subvencionimin e interesave të kredive për banesën e parë. Berisha e mbyll deklaratën e tij me thirrjen për protestë, duke e cilësuar atë si “të vetmen rrugë” përballë asaj që ai e quan politikë të spekulimit imobiliar dhe favorizimit të ndërtimit.