Mazhoranca pritet të nisë diskutimin në Komisionin e Ligjeve për draftin e ri të reformës territoriale, që parashikon uljen e numrit të bashkive nga 61 në 46. Propozimi i Partisë Socialiste kundërshtohet nga opozita dhe disa prej komuniteteve lokale që preken nga riorganizimi.
Ndërsa PS-ja synon ta çojë përpara reformën me votat e mazhorancës, demokratët shpresojnë që në nisje të sesionit të ri parlamentar të ketë më shumë presion ndërkombëtar për dialog dhe konsensus politik.
Komisioni Europian, në një përgjigje për A2 CNN, sqaroi se reforma territoriale nuk përbën kusht për anëtarësimin e Shqipërisë në BE. Brukseli thekson se çdo ndryshim duhet të zhvillohet përmes një procesi gjithëpërfshirës, duke marrë në konsideratë qëndrimet e forcave politike, aktorëve të përfshirë dhe veçanërisht komuniteteve lokale.
Pavarësisht kundërshtimeve, mazhoranca këmbëngul që zgjedhjet e ardhshme lokale të zhvillohen me 46 bashki, ndërsa PD-ja propozon 100 njësi vendore. Ky propozim, megjithatë, nuk është depozituar ende zyrtarisht në Kuvend.