48 orët në vijim janë vendimtare për PD-në. Gjykata e Posaçme do të vendosi për fatin e Berishës nëse do ashpërsojë masën e sigurimit. Seanca do të drejtohet nga gjyqtarja Irena Gjoka.
SPAK kërkon caktimin e masës “arrest në shtëpi” pasi Berisha nuk ka respektuar vendimin e gjykatës të dhënë më 20 Tetor duke i caktuar masën “detyrim paraqitje” dhe ndalim për të dalë jashtë vendit.
Berisha nuk e ka njohur vendimin e gjykatës që të paraqitej të hënën e parë dhe të tretë të çdo muaji duke argumentuar se vendimi është antikushtetues, pasi nuk ishte ndjekur rruga parlamentare.
Nuk dihet nëse Berisha do të marrë pjesë vetë në Gjykatën e Posaçme apo do të përfaqësohet nga avokatët e tij. Gjyqtarja Gjoka mund të vendosë të martën pasi të dëgjojë argumentat e palëve ose të dërgojë në “arrest në shtëpi” Berishën, osë të lërë në fuqi masën e mëparshme. Berisha akuzohet për korrupsion pasiv për çështjen e privatizimit të ish-klubit sportiv “Partizani”.