Me thirrje kundër qeverisë dhe kryeministrit Edi Rama, është mbajtur në Tiranë dita e 60-të e protestës së zhvilluar para godinës së Kryeministrisë. Gjatë tubimit, aktori Mehdi Malkaj u shpreh se, sipas tij, Edi Rama është tashmë një ish-kryeministër, ndërsa e akuzoi se me politikat e tij ka dëmtuar vendin dhe qytetarët. Kurse aktivisti Mirjan Aliaj, i cili i bëri thirrje Strukturës së Posaçme Kundër Korrupsionit dhe Krimit të Organizuar (SPAK) të arrestojë kryeministrin Rama.
“Për fatin e keq të kryeministrit, jemi më shumë se dje. Ky është fundi i Edi Ramës. Po ju tregoj një hulumtim të mediave të huaja mbi lejet që ka firmosur Edi Rama. Kjo është thirrje për SPAK-un. Kjo është provë ulëritëse dhe mjafton që të arrestohet Rama.
Hulumtimi flet për atë se kush e shiti bregdetin e Shqipërisë dhe për aferat gjigante të kësaj qeverie. Shpresoj që sekuestrimi i disa dokumenteve nga SPAK të lidhet me këtë hulumtim. Nëse jo, i bëj thirrje Prokurorisë të veprojë. Ne nuk kemi shkuar me pushim dhe as SPAK nuk duhet të shkojë, sepse atdheu është në rrezik. Anuloni ligjin për zonat e mbrojtura. Përveç anulimit të tij, SPAK duhet të arrestojë Ramën”, deklaroi Aliaj.
