Debati për dhunën e pretenduar ndaj protestuesve është zhvendosur në studion e “Të Paekspozuarit”, ku zv.ministrja e Brendshme, Silva Caka, ka dhënë qëndrimin e saj për veprimet e Policisë së Shtetit gjatë protestës. Në një lidhje me studion, Caka deklaroi se situata ka kaluar në disa faza, duke pranuar se fillimisht policia ka qenë e qetë, ndërsa më pas ka reaguar në përputhje me përshkallëzimin e situatës nga një pjesë e protestuesve. Ajo pranoi gjithashtu se në disa raste mund të ketë pasur tejkalim të detyrës nga efektivët. “Për sa kohë kemi policë të pezulluar, është tejkaluar detyra, ku efektivët e policisë ndoshta kanë kryer veprime që do t’i nënshtrohen hetimit”, u shpreh zv.ministrja, duke theksuar se rastet po hetohen nga Agjencia e Mbikëqyrjes Policore (AMP). Gjatë debatit, gazetarja Klodiana Lala i kujtoi Cakës qëndrimet e saj të mëparshme ndaj Policisë së Shtetit, kur ishte përfaqësuese e LSI-së, duke i kërkuar të distancohet nga dhuna e ushtruar ndaj protestuesve.
Pjesë nga biseda:
Rakipi: Pretendohet se ka pasur dhunë brutale ndaj protestuesve. Cili është qëndrimi juaj?
Caka: Në fakt, mendoj se kanë ekzistuar të tre skenarët: edhe një polici që ishte e qetë dhe e nënmenaxhoi situatën, edhe pas përshkallëzimit nga protestuesit, jo ata paqësorë, përshkallëzoi edhe policia. Pastaj ekziston edhe rasti kur, për sa kohë kemi policë të pezulluar, është tejkaluar detyra, ku efektivët e policisë ndoshta kanë kryer veprime që do t’i nënshtrohen hetimit. Nuk ka lidhje me shtypjen e protestës me dhunë, por ka qenë reagim ndaj elementëve që donin ta shfokusonin nga protesta paqësore në një protestë që djeg. Nuk e di cili ishte mesazhi që donin të përcillnin përmes këtyre veprimeve.
Lala: Zv.ministrja është e njëjta që e konsideronte policinë të kriminalizuar, ndërsa tani është në një tjetër pozicion.
Rakipi: Nuk e ka thënë.
Lala: Kemi raste plot. E vetmja gjë që duhet të bëjë zv.ministrja është të kërkojë falje dhe të distancohet nga Policia e Shtetit. Minimalisht, si zonjë dhe si zv.ministre, duhet të distancohet.
Caka: Klodi, mendoj se është e panevojshme, sepse nuk jemi këtu të flasim as për mua dhe as për ty.
Lala: Nuk fola për ju, fola për Silva Cakën si ish-pjesëtare e LSI-së dhe sot si zv.ministre e Brendshme.
Caka: Sigurisht që unë nuk ndryshoj nga ato që kam thënë. Nëse kujtohesh, patjetër që nuk i kam përgjithësuar kurrë të gjithë policët, por në çdo protestë edhe i kam mbrojtur.
Lala: Distancoheni apo jo nga dhuna?
Caka: Si nënë, si grua dhe si qytetare e këtij vendi, një ndjesë qytetare për çdo njeri që, për arsye të anarkisë, mund të ketë pësuar një dëm në kurriz të tij. Sigurisht që jo vetëm unë, por çdo punonjës i Policisë së Shtetit mund të ketë një ndjesë për çdo qytetar që është përballur ose prekur nga veprimtaria e Policisë së Shtetit. Ajo që është më e rëndësishme për mua është se policia ka ditur të vetëkorrigjohet. Rastet kur ka pasur tejkalim janë pezulluar dhe janë në hetim nga AMP-ja.
Lala: A ka Ministria e Brendshme një qëndrim për kapuçzinjtë që dolën nga Ministria dhe u bashkuan me protestuesit? Po për zyrtarët që ishin me maska dhe qëndruan brenda PS-së, duke krijuar përplasje të fortë me protestuesit?
Caka: Unë e kam parë atë video dhe, me aq sa kam mundur të shoh të gjithë zonën, nuk më duket si zonë e Ministrisë së Brendshme. Nuk kam asnjë informacion që kanë dalë nga Ministria e Brendshme.
Lala: Kemi pamje filmike. A mbrohet një seli nga paramilitarë?
Caka: Në pamjet filmike që unë kam parë, nuk kanë dalë nga Ministria e Brendshme.
Lala: A mbrohet PS-ja nga paramilitarë?
Rakipi: Rama dhe Balla thanë se janë militantë të PS-së. Ata thanë se ishin njerëz të PS-së dhe se ata mbrojnë partinë.
Caka: Unë nuk jam anëtare e PS-së dhe nuk jap mendime se si organizohen partitë politike në vetvete.
Rakipi: Në ditët në vijim, nëse protesta do të jetë në gjendje revolte, a ka marrë policia trajnime për të operuar në mënyrë normale?
Caka: Në fakt, policia e ka pjesë të procedurave të veta mënyrën se si e përballon një protestë. Janë procedura që zbatohen në bazë të situatave që mund të lindin nga momenti në moment. Elementet për të mbrojtur rendin dhe sigurinë publike i vendosin trupat operacionale në bazë të komandës së tyre, nëse ka përshkallëzim.