Drejtoria Vendore e Policisë Tiranë ka ftuar për t’u paraqitur dhe dhënë shpjegime kompozitorin Adrian Hila, pas publikimit dhe shpërndarjes në rrjetet sociale të disa videove me përmbajtje intime.
Efektivët e policisë janë paraqitur në banesën e kompozitorit për ta kontaktuar, por nuk e kanë gjetur aty. Autoritetet kanë arritur ta kontaktojnë në telefon, ndërsa Hila është shprehur se ndodhet në gjendje të rënduar emocionale dhe se dyshon se pajisjet e tij janë hakuar. Kompozitori mësohet t’u ketë deklaruar efektivëve se do të paraqitet në polici sapo të mbërrijë në Tiranë.
Policia ka thirrur për të dhënë deklarime dhe personat e tjerë që shfaqen në video tashmë të identifikuar, por disa mund të pyeten në një moment të dytë për shkak të gjendjes së rënduar psikologjike.
Specialistët e Krimit Kibernetik kanë nisur verifikimet për të hedhur dritë mbi origjinën e materialeve, mënyrën e përftimit të tyre dhe personat që kanë kryer shpërndarjen në rrjetet sociale.
Hetimet vijojnë për të përcaktuar rrethanat e publikimit të videove dhe nëse pas tyre qëndron një sulm kibernetik apo një veprim tjetër i paligjshëm.