Ashtu siç e paralajmëroi 5 ditë më parë në emisionin “Opinion” në Tv Klan, kreu i “Nismës Shqipëria Bëhet”, Adriatik Lapaj ka denoncuar në Gjykatën e Posaçme për shpifje Agron Shehajn.
Sipas Klan News, Lapaj është shprehur se ka të paktën 8 raste të dokumentuara të shpifjes.
Në një fjalë për mediat në dalje të Gjykatës së Posaçme, Lapaj është shprehur se nuk e dëshironte një konflikt të tillë pasi sipas tij ai që gëzohet nga ky konflikt është Edi Rama. Ai thekson se nuk ka dashur konflikt mes partive të reja, por kush kërkon luftë u shpreh se luftë do të gjejë.
“Nuk e kam dashur këtë konflikt sepse ai që fërkon barkun nga ky lloj konflikti është Edi Rama, por zoti Shehaj e kërkoi me qiri duke pretenduar që kemi gjëra për të fshehur dhe frikë. Unë s’kam pasur frikë nga Edi Rama e Sali Berisha dhe jo më nga Agron Shehaj. Unë nuk kam dashur të krijoj konflikt mes të resë, por kush kërkon luftë luftë do gjej”, shprehet Lapaj.
Kujtojmë se në emisionin e të enjtes së kaluar (27 Mars), kreu i partisë “Mundësia”, Agron Shehaj në studion e emisionit “Opinion” solli disa dokumenta të cilat sipas tij tregojnë se kreu i “Nismës Shqipëria Bëhet”, Adriatik Lapaj përfshihet në çështje pronash në bregdetin e Shqipërisë.
Shehaj në fjalën e tij u shpreh se është e vështirë të gjesh një pronë në bregdet që s’ka futur hundët Adriatik Lapaj, duke nënkuptuar se janë shumë çështje, për të cilat janë në dijeni si kryetarët e partive të mëdha e të vogla, ashtu edhe media, por nuk flasin.
Ndërkohë nuk vonoi shumë edhe përgjigja live e Adriatik Lapajt, i cili bëri të ditur se do të padisë deputetin Agron Shehaj ditën e hënë për akuzën e shpifjes.
Lapaj ndërhyri në emision, duke i dërguar një mesazh në celular drejtuesit të emisionit Blendi Fevziu, ku bëri me dije publikisht se denoncimi ndaj deputetit do të bëhet në fillim të javës së ardhshme.