Adriatik Lapaj: Ja pse kërkoj debat me Edi Ramën

Përfaqësuesi i “Shqipëria Bëhet”, Adriatik Lapaj foli edhe për sfidën publike që ai i ka bërë kryeministrit Edi Rama për të dalë në debat me të. Lapaj ngriti një sërë pyetjet, por dha edhe disa përgjigje se pse ai e kërkon këtë debat në këtë moment me kryeministrin e vendit.

“E para, duhet të dakordësohemi, a duhet të ketë debat politik në këtë vend? A duhet që drejtuesi i një shteti duhet të dalë në debat para zgjedhjeve? Ju jeni dëshmitarë që ai nuk i lejon ministrat të dalin në debate? A duhet të kenë shqiptarët një parballje të ideve me atë që i drejton dhe ata që janë sfidantët? Unë besoj që duhet të ketë. Unë si një kandidat në këto zgjedhje që drejton një subjekt politik, që mund të jetë shumë i vogël, por mund të rezultojë i mesëm, por edhe i madh. Kjo mbetet për t’u parë.

A ka të drejtë edhe në emër të atyre që përfaqësoj ta thërras në debat liderin e mazhorancës? Unë nuk mund ta thërras Ramën e ti them, ti dil në debat me Berishën. Do të ishte logjike kjo? Do të ngjaja si idiot. Unë dal dhe e sfidoj në debat kryeministrin e vendit tim në raport me idetë që forca politike që unë kam përfaqëson.

Unë as po e dhunoj zotin Rama, as po e shaj, as po e fyej, as po e kërcënoj, unë po i them që në një demokraci funksionale, ai që ka pushtetin duhet të dalë në debat me rivalët. Pastaj, nëse vijmë te diskutimi a e meritoj unë të jem në debat me kryeministrin e vendit.

Unë bëj pyetjen, shtetasit e Republikës së Shqipërisë, a janë të barabartë para ligjit? A ka një ligj për partitë politike që përcakton si organizohen partitë politike? Përtej kësaj, a përfaqësoj unë sot mijëra qytetarë që vijnë në aktivitetet tona? A e meritoj unë të jem në debat me Ramën, këtë e vendos standardi që kemi vendosur me njerëzit, por që debat duhet të ketë, duhet të ketë”, tha Lapaj në A2 CNN.