Afat deri më 26 dhjetor, KQZ njofton qytetarët për qendrën e votimit

Komisioni Qendror i Zgjedhjeve u ka bërë thirrje qytetarëve me të drejtë vote që ta mësojnë qendrën e tyre të votimit duke vizituar platformën elektronike të KQZ-së.

Në një konferencë për media, zëdhënësi i KQZ-së, Valmir Elezi tha se përmes kësaj platforme qytetarët do të mund ta ndryshojnë përmes telefonit qendrën e votimit brenda komunës së tyre, duke e caktuar sa më afër vendbanimit të tyre.

“Deri më 26 dhjetor 2024, çdo qytetar me të drejtë vote nëse dëshiron që ta ndërrojë Qendrën e Votimit brenda komunës dhe ta caktojë atë sa më afër vendbanimit të tij, mund ta bëjë përmes platformës elektronike: http://qv.kqz-ks.org ose duke paraqitur kërkesën në Komisionin Komunal të Zgjedhjeve, në komunën përkatëse të votuesit. Në platformën elektronike është e mjaftueshme që votuesi të shënojë numrin e tij të identifikimit dhe datëlindjen, dhe menjëherë do të shfaqen të dhënat për qendrën aktuale të votimit.

Nëse votuesi dëshiron që ta ndërrojë qendrën e votimit brenda komunës, duke e caktuar atë sa më afër vendbanimit të tij, mund të paraqesë kërkesën e tij përmes kësaj platforme dhe pasi kërkesa do të shqyrtohet nga KQZ, brenda një kohe të shpejtë do të marrë përgjigje”, njoftoi Elezi.