7 muaj në arrati dhe vetëm 24 orë qëndroi në pranga. Po flasim për ish-kreun e Bashkisë së Vorës, Agim Kajmaku, i cili të enjten ka lënë edhe spitalin. Sipas spitalit, ai vuan nga sëmundjet: hematemeze dhe diabet melloitus. Gjykata e Apelit liroi Kajmakun pasi i dha masën e sigurisë “detyrim paraqitje” dhe sipas vendimit, ai duhet të paraqitet 2 herë në muaj në prokurori.
Seanca e radhës do të zhvillohet më 15 korrik. Ka qenë vetë organi i akuzës, i përfaqësuar nga ish-kryeprokurorja e përkohshme, Arta Marku që ka kërkuar zbutjen e masës së sigurisë me argumentin se Kajmaku nuk mund të qëndronte në burg për shkak të gjendjes së tij shëndetësore. Kajmaku u arrestua katër ditë më parë pasi u paraqit në gjendje të rëndë në një spital privat për shkak të diabetit. Gjykata e Tiranës shtyn për të hënën seancën e verifikimit të kushteve të masës se sigurisë për Agim Kajmakun.
Shkak është bërë mosprania fizike e tij në seancë. Në sallën e gjyqit avokati ka paraqitur një vërtetim që Kajmaku ka qenë i shtruar deri pasditen e djeshme. Ndërsa prokurori i çështjes ka kërkuar shpallje të moskompetencës dhe dërgim në Gjykatën e Apelit. Apeli i Tiranës ndryshoi masën e sigurisë “arrest ne burg”, marrë në mungesë për Kajmakun, në “detyrim për paraqitje”.
