Akademia e Sigurisë a duhet të mbajë emrin e Ilir Ngresit?

Policia e Shtetit ka detyra të vështira në luftën ndaj bandave kriminale shqiptare. Këto banda tashmë janë bërë edhe më të sofistikuara dhe gjakatare. Mafia siçiliane është “lule” në krahasim me këto shqiptare të cilat tashmë operojnë në trafikun ndërkombëtar të kokainës që nga Amerika Latine e deri në Europë.

Ndërkohë policia e Shtetit është mbushur ndër vite me disa lapidarë, ku ndër to shkëlqen emri i Ilir Ngresit nga Vlora.

Ai u vra me 30 dhjetor 2000 afër shtëpisë së tij. Major Ngresi njihej si oficer kurajozë dhe një shembull për profesionalizmin e tij policor. E plagosën bandat dhe ai nuk u tërhoq nga detyra pasionante e oficerit të policisë së shtetit në luftën ndaj krimit të organizuar.

Më pas e ekzekutoi mafia shqiptare.

Sivjet në dhjetor, mbushen 25 vite nga vrasja e tij. Ai është “dëshmor i Atdheut”, një shesh në bulevardin kryesor të Vlorës mban emrin e tij. Bashkia e Beratit e ka qytetar nderi.

Siç thamë janë disa që kanë rënë në krye të detyrës në këto 35 vite demokraci, por Ilir Ngresi mbetet simboli i oficerit shembullor shqiptar, ndaj në respekt të tij dhe të atyre që kanë rënë në krye të detyrës, burime serioze nga qeveria treguan se po diskutohet që Akademia e Sigurisë në Tiranë të marrë emrin Ilir Ngresi.

Ai, tashmë, me shokët e tij që kanë dhënë jetën për shtetin shqiptar e meritojnë një nder të tillë kombëtar.