Aksidenti me 3 viktima, eksperti: Po të kishte barriera mjeti s’do kishte përfunduar në Shkumbin

Aksidenti me 3 viktima në Librazhd, është një kambanë alarmi për sigurinë rrugore. Eksperti i sigurisë Rrugore, Islam Qibini ka ndërtuar skemën e aksidentit të djeshëm në aksin rrugor Elbasan-Librazhd.

Për të nëse do të kishte një strukturë metalike, mund të ishte parandaluar që makina të kishte përfunduar në lumin Shkumbin.

“Ndoshta ka shmangur rënien e gurëve, ndërsa ai që vinte nga Librazhi në drejtim të Elbasanit, ka qenë në aksin e vet dhe si pasojë e përplasjes, ML ka goditur mbrojtësen metalike e cila nuk ka qenë plotësisht e fiksuar dhe për pasojë ka përfunduar në Shkumbin. Mbrojtëse metalike vendosen qëllimisht që të mbrojnë drejtuesin dhe të parandalohet dalja jashtë rrugës, por nëse kemi një mbrojtëse që nuk është e fiksuar, detyrimisht, nuk mund ta përballojë se nuk ka bazamentin e duhur”, tha ai.

Fajtor për aksidentet e shumta rrugore, shpesh me bilance tragjike bën edhe vetë shoferët që nuk respektojnë rregullat e qarkullimit rrugor. Një arsye për një numër të shtuar të aksidenteve në dimër, për Qibinin është mospajisja me gomat dimërore apo edhe me zinxhirët.