Aktet e PD gjatë marshimit, ministrja Koçiu: Sulm ndaj stabilitetit të vendit! Sali Berisha po merr peng Shqipërinë

Ministrja e Brendshme në detyrë, Albana Koçiu ka reaguar sërish pas akteve të dhunës në protestën e sotme të Berishës. Përmes një postimi në rrjetet sociale, Koçiu e ka cilësuar protestën e Berishës një sulm të hapur ndaj stabilitetit të vendit. Teksa ka paralajmëruar agresorët për një përgjigje të fortë, Koçiu ka thënë gjithashtu se sulmi në vilën e Enver Hoxhës, ku kishte edhe njerëz brenda, tregon degradimin e plotë të lëvizjes së Berishës.

Postimi i plotë i Albana Koçiut:

U vërtetua se objektivi i vërtetë i kësaj dhune është dëmtimi i drejtpërdrejtë i ekonomisë shqiptare, sabotimi i turizmit dhe përpjekja për të nxirë me çdo kusht imazhin e Shqipërisë në sytë e botës, pikërisht në momentin tonë më të mirë.

Maskat ranë përfundimisht. Sot u shfaq hapur dhe pa asnjë dritëhije objektivi i vetëm i Sali Berishës dhe familjes së tij: mbajtja peng e Shqipërisë për llogaritë e tyre personale. Ajo që pamë në rrugët e Tiranës nuk ishte një protestë demokratike, por një shfaqje e pastër e një sjelljeje antikombëtare dhe anti-shqiptare, ku interesi personal i një individi dhe i familjes së tij vendoset mbi qetësinë dhe sigurinë e një populli të tërë.

Ky nuk është më aksion politik, por një sulm i hapur ndaj stabilitetit të vendit. Shqipëria, qytetarët e këtij vendi dhe jeta e përditshme e këtij kombi nuk mund të mbeten peng i një tufe banditësh të armatosur me molotovë, që kërkojnë të shkaktojnë kaos dhe terror. Në çmendurinë e tyre, ata nuk kursyen as artin, duke goditur një rezidencë ku ndodheshin artistë të huaj, një akt që tregon degradimin e plotë të një lëvizjeje që nuk njeh asnjë vlerë njerëzore.

Ky sulm ndaj interesave të Shqipërisë dhe qytetarëve shqiptarë është i paprecedentë dhe nuk do të tolerohet. Po aq e vendosur dhe e paprecedentë do të jetë edhe përgjigjja institucionale, në mbrojtje të rendit, sigurisë dhe të ardhmes europiane të vendit.