Aktivistja Çepani: Në protesta nuk është këputur qoftë edhe një lule

Aktivistja Edlira Çepani i ka cilësuar protestat e ditëve të fundit si ndër më paqësoret që janë zhvilluar në vend, duke theksuar se ato kanë lindur dhe po vazhdojnë në mënyrë spontane, pa një organizim apo agjendë të qartë politike. E ftuar në emisionin “3D”, Çepani tha se kjo lëvizje ka dalë përtej kornizave tradicionale të protestës, pasi qytetarë të shumtë po i bashkohen asaj në Tiranë, në qytete të tjera të vendit dhe në diasporë për të shprehur pakënaqësitë e tyre.

“Kjo është një protestë që nuk ka plan, nuk ka agjendë dhe nuk është e organizuar. Ka dalë përtej kornizave me të cilat jemi mësuar”, u shpreh ajo. Sipas Çepanit, karakteri paqësor i protestave është një tregues pozitiv për shoqërinë shqiptare. Ajo vlerësoi veçanërisht pjesëmarrjen e të rinjve, duke theksuar se “duhet të jemi krenarë që kemi rritur një brez të rinjsh tipik europian”.

Duke folur për vijimësinë e protestës, Çepani kërkoi më shumë përgjegjësi nga institucionet për të adresuar problematikat e ngritura nga qytetarët. Ajo veçoi edhe zhvendosjen e protestës në rrugën e Rinasit, duke e cilësuar si një provë të potencialit që kjo lëvizje ka për t’u zgjeruar dhe për të ushtruar më shumë ndikim në të ardhmen.