Aktivistja Vatnikaj: Policia të arrestojë autorin që i drejtoi th*kën Gent Prognit, jo të zbatojë urdhrat politikë

Sonte u mbajt protesta numër 58-të dhe aktivistja Sidorela Vatnikaj në fjalën e saj tha se është detyra e autoriteteve të mundësojnë që kjo protestë të jetë paqësore. Ajo kërkoi arrestimin e policit, i cili tentoi të godiste me thikë aktivistin Gent Progni.

“Sot, ndërkohë që u mblodhëm para Parlamentit, i cili nuk na përfaqëson më, jemi përballur me një dhunë policore joproporcionale. Jemi përballur me dhunë dhe represion policor. Është e patolerueshme që shteti ta shohë protestën tonë paqësore si një arsye për të nisur dhunën.

Janë shkelur protokollet dhe sot u kalua vija e kuqe. Njërit prej nesh një civil i ka tentuar t’i drejtojë thikën. Ata mendojnë se na frikësojnë, sepse mendojnë se jemi vetëm trupa, por ne kemi me vete dëshpërimin e dhjetëra brezave që ju i keni ropatur.

Ne jemi këtu sepse besojmë te shteti i së drejtës. Ndaj bëjmë thirrje për arrestimin e menjëhershëm të personit që i drejtoi thikën një protestuesi paqësor.

Policia të mos ndjekë urdhrat politikë të Taulant Ballës dhe Ulsi Manjës. Mundësoni që ky revolucion qytetar të jetë paqësor. Nëse preket njëri prej nesh, është detyra juaj që ky revolucion të mbetet vetëm paqësor”, tha Vatnikaj.