“Albanian Digital Solutions”, Rama: 1100 aplikime dhe nevojë për kapacitete të reja digjitale

Kryeministri Edi Rama, në podkastin “Flasim”, ka folur për zhvillimet më të fundit në procesin e transformimit digjital të administratës publike, duke theksuar krijimin e një kompanie të re shtetërore dhe rritjen e kapaciteteve teknologjike në shërbim të qeverisjes.

Sipas tij, “Albanian Digital Solutions” përfaqëson një fazë të re të modernizimit të shtetit shqiptar dhe vjen pas një periudhe ku janë ndërtuar platforma digjitale dhe janë dixhitalizuar mbi 1200 shërbime publike. Këto shërbime, siç u shpreh Rama, tashmë ofrohen në mënyrë elektronike për qytetarët përmes platformës e-Albania, duke shënuar një hap të rëndësishëm në lehtësimin e aksesit ndaj administratës.

Kryeministri theksoi se qëllimi i kësaj nisme është kalimi në një etapë të re të qeverisjes elektronike, ku teknologjia do të luajë një rol edhe më të thellë në transformimin e institucioneve publike. Kompania e re, sipas tij, do të shërbejë si një qendër ekselence për profesionistët dhe talentet shqiptare në fushën e teknologjisë, duke zhvilluar zgjidhje inovative për administratën dhe shërbimet publike.

Rama u ndal gjithashtu te rritja e interesit për programet e inovacionit, duke bërë të ditur se në ciklin e fundit të granteve të “Startup Albania” janë regjistruar mbi 1100 aplikime. Ai e cilësoi këtë si një tregues pozitiv të zhvillimit të ekosistemit të inovacionit në vend dhe të pozicionimit të Shqipërisë në hartën europiane dhe globale të teknologjisë.

Megjithatë, sipas tij, mbetet ende shumë për të bërë, sidomos në sektorin privat, ku kërkohet një zhvillim më i shpejtë i inovacionit dhe përdorimi më i gjerë i teknologjisë së re. Në këtë kuadër, ai përmendi edhe ristrukturimin e AKSHI-t, ku rolet do të ndahen më qartë mes monitorimit dhe zhvillimit të zgjidhjeve digjitale.

Sipas këtij modeli të ri, AKSHI do të funksionojë si institucion drejtues dhe mbikëqyrës i cilësisë, ndërsa “Albanian Digital Solutions” do të shërbejë si struktura kryesore që do të krijojë dhe mirëmbajë zgjidhjet teknologjike për administratën publike, duke synuar një transformim të thellë dhe të qëndrueshëm të shërbimeve shtetërore.