Alfred Lela: Rama e ka hequr maskën, tashmë është vetë përballë drejtësisë

Alfred Lela, drejtor i Komunikimit në Partinë Demokratike thotë se kryeministri Edi Rama tashmë e ka hequr maskën në raport me drejtësinë, pasi ka “hallin e vetes”. Sipas Lelës tashmë jemi në kushtet kur vet Rama është përballë drejtësisë, dhe drejtësia s’është më ajo që dikur thuhej se e ka bërë Partia Socialiste.

“Sjellja e gjithë javëve të fundit na ekspozoi një Ramë siç ai është në të vërtetë, e ka hequr maskën dhe tani është Rama, ai Ramë që ne nëpërmjet retorikës dhe propagandës së tij, e kujtonin një pjesë e publikut si një Ramë që ishte me drejtësinë, për drejtësinë, i drejtësisë. Rama që thoshte s’e kanë bërë as amerikanët, as europianët, e ka bërë PS.

Gjithë narrativa e tij, ligjërimi publik i Ramës si kryeministër dhe kryetar i PS, ka qenë që ne e bëmë drejtësinë dhe ajo duhet për t’i dhënë fund pandëshkueshmërisë, dhe deri para një muaji e ca, ju e mbani mend sinjalet që i jepte SPAK-ut, frymëzimet, kë duhet të kapte, kë duhet të linte dhe u desh të ndodhte një hetim për zëvendësen e tij, një prej njerëzve më të afërt që është Belinda Balluku, për të kuptuar që Rama e kishte skemë, pra s’ishte Rama i vërtetë, por ishte Rama me maskë.

Logjika e zemëratës së Ramës, e një tabloje të re që ai po ndërton në ligjërimin publik në raport me drejtësinë, të çon vetëm te një premise, te një përfundim: Rama duhet të ketë frikë diku, për diçka nga dikush, në këtë rast nga Belinda. Nuk shpjegohet ndryshe ky ndryshim”, tha Lela në ”A2cnn”.