Alfred Qefalia: Policia më ka thyer brinjët, që të pranoj krime që s’i kam kryer
Alfred Qefalia, i akuzuar si anëtar i bandës së vrasësve me pagesë dhe dhe që vendosnin eksploziv, ka mohuar akuzat që rëndojnë ndaj tij. Ai thotë në një intervistë për Neës 24, se policia e ka dhunuar që të pranojë pjesmarrjen në këtë bandë. “Unë jam i akuzuar nga prokuroria vetëm për dhënie ndihme në arratisje nga burgu, për asgjë tjetër nuk më akuzon dot prokuroria. Unë nuk mund të mbulojë krimet e policisë”, tha ai
Qefalia shprehet se policia e ka rrahur për të pranuar vrasjet me pagesë dhe vënien e tritolit. “Ma kanë bërë kokën daulle, më kanë thyer brinjët që të pranojë, por unë nuk kam çfarë të pranojë, pasi nuk kam lidhje me to. Çfarë të pranoj”, shprehet Qefalia.
Ai tha gjithashtu se Admir Tafilin e ka njohur në burg, ndërkohë emrin e Kristi Pines, për herë të parë që e ka dëgjuar, është kur e arrestuan. “Tafilin e njoh, kemi qene ne burgun 313, ndërkohë nuk kam asnjë lidhje me Kristi Pinen. Nuk di kush mund të jetë ky person. Ndoshta ai ka marrë informacione nga policia dhe publikon në emrin tim për të marrë statusin e të penduarit. Edhe policia kur me ka ardh këtu, ma kanë bërë kokën daulle që të pranoj këto krime. S’kam ç’të pranoj”, këmbëngul ai.
Ndërkohë, Dhimitër Ziton, që u arrestua një ditë më parë si anëtari tjetër i grupit të vrasësve me pagesë, Qefalia ka thënë se e njeh, pasi ka qenë i punësuar në biznesin e tij, por vetëm kaq.
