Ambasadorët e Spanjës e Francës: Shqipëria progres drejt BE! Schieder: Me këtë ritëm, shanse të forta për anëtarësim

Përparimi i qëndrueshëm drejt BE-së, shihet si një fakt pakontestueshëm dhe nga vendet anëtare apo dhe strukturat europiane. Për ambasadoren e Francës askush nuk mund të dyshojë që Shqipëria ka bërë hapa gjigandë.

“Pikërisht këtë besim erdhi të dëshmonte Presidenti Macron gjatë dy vizitave ë tij në Shqipëri. Franca është përkrah jush jo për t’iu numëruar hapat, por si një partner rruge që e di se forca e një bashkimi nuk matet vetëm në ditën e nisjes dhe të mbërritjes. Bëhet fjalë të mësojmë duke ecur”, tha ajo.

Nëse ecet me të njëjtin ritëm, shanset që anëtarësimi të realizohet në fund të këtij dhjetëvjeçari, janë realiste, sipas Andreas Schieder-it, raportuesit për Shqipërisë në Parlamentin Europian.

Kuvendi dhe qeveria ka bërë punë shumë të mirë. Nëse vijohet me të njëjtin ritëm dhe të mbyllen kapitujt, reformat të përmirësojnë jetesën, ka një shans shumë të mirë për në fund të kësaj dekade. Nuk dua të përmend një datë specifike, por ne në Parlamentin Europian mandatin e kemi deri në 2029 dhe do të doja që si relatori për Shqipërinë t’ju them që Shqipëria do të bëhet shtet anëtar gjatë këtij mandati, deri në 2029”, theksoi Schieder.

Bilancin për progresin që Shqipëria ka bërë në procesin e integrimit Evropian e bëri Ministrja e Jashtme Elisa Spiropali, ndërsa vendi thotë se tashmë ka një tjetër reputacion në skenën ndërkombëtar.

“Në vetëm 13 muaj, nga tetori 2024 deri në nëntor 2025, falë një vizioni të qartë, pune të ditëpërditshme, përpjekjesh të përbashkëta dhe një koordinimi të vendosmerisë politike me aftësinë institucionale, kemi hapur, së bashku me Komisionin Europian dhe me Vendet Anëtare, 33 kapitujt e negocimit.

Gjatë muajve të fundit, si asnjëherë më parë me këtë ritëm, kemi punuar me ngulm për të arritur sa më parë piketat e ndërmjetme për Themeloret. Pak ditë më parë në Parlament u miratua paketa e fundit legjislative, duke i dhënë procesit peshën dhe seriozitetin që kërkon e meriton, për avancimin sa më parë me fazën vijuese, edhe me kërkuese e sfiduese, atë të fillimit të mbylljes së kapitujve. 2026 është vit vendimtar për objektivin tonë për mbylljen e kapitujve brenda viti 2027-s”, tha Spiropali.

Por mbyllja e negociatave nuk është hapi I fundit. Do të jenë vendet anëtare ato që do duhet në unanimitet t’i thonë po hyrjes së Shqipërisë. Në këtë rast vendimmarrja është politike. Drojës së vendeve anëtare se me zgjerimin, vende të vogla, si Shqipëria do të kishin status të barabartë me to në tryezën e përbashkët, kryeministri Rama i ka paraprirë me idenë e anëtarësimit pa të drejtë vetoje, apo dhe përfaqësimi me komisionerë

Spanja, thotë ambasadori Gabriel Ventura e sheh të realizueshme këtë ide. “Nuk mund të jap opinion zyrtar për këtë propozim, por mund të jetë dicka për tu marrë në konsideratë sidomos në kontekstin që duhet ta njohim, të paaftësisë së BE për të cuar përpara reformat e nevojshme, për tu siguruar që organizatat të funksionojnë në mënyrë efikase ndërkohë që numri I anëtarëve rriten. Kjo është një çështje që kryeministri i Spanjës e ka mbrojtur në mënyrë të vazhdueshme”, tha ai. Sfida e Shqipërisë në këtë fazë është mbyllja e grupkapitujve, me ambicien që procesi teknik i integrimit evropian të përmbyllet brenda vitit 2027. /Shqiptarja.com/