Amnistia fiskale, drafti i ri po punohet me ekspertë europianë

Sot u nënshkrua një marrëveshjeje trepalëshe midis Bankës së Shqipërisë, Ministrisë së Brendshme dhe Prokurorisë së Përgjithshme për koordinimin në luftën ndaj falsifikimit të kartëmonedhave. Shifrat e falsifikimeve kanë rënë ndjeshëm përgjatë viteve të fundit.

Gjatë takimit, u fol edhe për amnistinë fiskale e cila u tha se do të bëhet me asistencën e ndërkombëtarëve. Në përpjekje për të mos hasur më rezistencë nga Bashkimi Europian, Britania apo organizmat e tjerë të huaj, që i druhen shfrytëzimit të ligjit për pastrim parash, qeveria ka deklaruar se po rishikon draftin e amnistisë, sipas rekomandimeve të partnerëve.

I pyetur nëse qeveria ”Rama 3” është konsultuar me Bankën e Shqipërisë për draftin e ri, guvernatori Gent Sejko përsëriti qëndrimin se nisma do të ketë rol të rëndësishëm në formalizimin e ekonomisë.

Rreziku i pastrimit të parave është shqetësimi kryesor i shprehur, jo vetëm nga partnerët e huaj, por edhe grupet shqiptare të interesit. Ndaj kryeprokurori Olsian Çela deklaroi se parandalimi dhe zbulimi i kësaj vepre, do të marrë vëmendjen maksimale të institucionit që ai drejton.