Antigonea magjeps turistët, rritje me 21% e vizitorëve në gjysmën e parë të vitit

Parku Arkeologjik i Antigonesë po njeh një interes gjithnjë e më të madh nga vizitorët vendas dhe të huaj.

Vetëm në gjysmën e parë të vitit 2025, ai ka regjistruar një rritje prej 21% të numrit të vizitorëve krahasuar me të njëjtën periudhë të një viti më parë.

E vendosur në zemër të luginës së Drinos, Antigonea është një destinacion që nuk duhet lënë jashtë listës së udhëtimeve këtë verë, raporton Tv Klan.

Vizitorët përjetojnë aty jo vetëm një udhëtim në historinë e lashtë shqiptare, por edhe bukurinë e një natyre të paprekur dhe monumente të rralla me vlerë të jashtëzakonshme kulturore.

I shtrirë në rreth 92 hektarë, parku ruan gjurmët e qytetit antik të themeluar nga mbreti Pirro i Epirit në vitin 295 para Krishtit, në nder të bashkëshortes së tij Antigona.

Antigonea ishte një qendër e rëndësishme e provincës së Kaonisë dhe kontrollonte një pjesë strategjike të rrugës së famshme Via Egnatia, që lidhte Dyrrahun me pjesën jugore të Epirit.

Parku ofron një mozaik të pasur të periudhave historike, nga prehistoria deri në kohët moderne.

Mozaikë paleokristianë, kisha të hershme si ajo e Shën Kollit në Saraqinishtë, Manastiri i Spilesë, si dhe banesa të periudhës osmane me arkitekturë të shekujve XVII-XVIII, të gjitha dëshmi të gjalla të trashëgimisë kulturore dhe shpirtërore që mbart kjo zonë.

Antigonea po rikonfirmohet si një ndër pikëreferencat më të rëndësishme të turizmit kulturor në Shqipëri, një vend ku historia, natyra dhe trashëgimia ndërthuren në mënyrë magjepsëse.