Aplikimi online “Shtëpia ime”/ Qytetarëve që iu janë dëmtuar shtëpitë nga tërmeti duhet të drejtohen në këto sportele. Dokumentet që duhet të kenë me vete

Bashkia e Durrësit njofton të gjithë qytetarët e saj, të cilëve iu jaën dëmtuar banesat nga tërmeti i fortë i 26 nëntorit, që të drejtohen në sportelet që ka hapur bashkia dhe njësitë administrative.

Në njoftim saktësohen edhe dokumentet që duhet të ketë çdo qytetar, me qëllim që të aplikojë në këto sportele.

Njoftimi i Bashkisë Durrës:

Shtohen sportelet brenda dhe jashtë njësive administrative për aplikimin online “Shtëpia ime”

Bashkia e Durrësit shton numrin e sporteleve për aplikimin online.

“Shtëpia ime”-platforma online e aplikimit për programet e Rindërtimit, brenda dhe jashtë njësive administrative për ti ardhur në ndihmë qytetarëve që që kanë pësuar dëme në shtëpitë e tyre nga tërmeti i Nëntorit.

Janë 56 sportele në njësitë administrative por edhe jashtë tyre ku banorët e Durrësit mund të aplikojnë. Sportelet e shtuara jashtë njësive administrative janë në godinat e ndërmarrjes Komunale Plazh, ish Parku i Autobuzëve, ndërmarrja Rruga Shkozet dhe drejtoria e Policisë Bashkiake.

Në shërbim të qytetarëve në të gjitha sportelet janë punonjës të trajnuar posaçërisht për këtë proçes të cilët do të punojnë me orare të zgjatura. Orari i sporteleve për aplikimin online është çdo ditë ora 08.00-18.00.

Të gjithë banorët e Durrësit të cilëve u janë dëmtuar shtëpitë nga tërmeti duhet të paraqiten në këto sportele me kartën e identitetit dhe një dokument pronësie të shtëpisë. Ky proces i aplikimit online po vijon me intensitet ku deri tani kanë aplikuar rreth 350 qytetarë.