I ftuar në emisionin “Real Story” në News 24 me Sokol Ballën ishte këtë mbrëmje edhe diplomati Arben Çejku. Ky i fundit komentoi situatën në rajon, në kushtet kur Serbia e Kosova pritet të ulen bashkë në Uashington, për të finalizuar një marrëveshje që thuhet se do të jetë ekonomike.
Por çfarë fshihet pas saj? Për diplomatin Çejku, vizita e Presidentit serb Aleksandër Vuçiç në Moskë, para shkuarjes në Uashington, tregon se do të marrë “lejen” për të vijuar me njohjen e mundshme siç tha, të shtetit të Kosovës, nga Serbia.
“Udhëtimi i tij në Moskë kërkon mirëkuptim për marrëveshjen me Kosovën. Në planin e brendshëm nuk ka më pengesa ai, se opozita i bojkotoi zgjedhjet. Opozita atje thotë se Vuçiç e tradhtoi Serbinë dhe do të njohë pavarësinë e Kosovës. Marrja e një “ok” nga Moska është një kartë lehtësuese për të. Ndërsa në Kosovë ka një stabilitet politik. Besoj që opozita do ketë qëndrimet e veta, por shpresojmë të ketë një zgjidhje të shpejtë me ndihmën e diplomacisë amerikane.
E ulur indirekt në këtë tryezë do jetë edhe Moska e cila do japë qëndrimin e saj. Ndonjëherë duket më e vështirë pavarësia e Serbisë nga Moska se sa e Kosvës nga Serbia. Do i hiqte një kartë e fortë Rusisë nëse Serbia njeh Kosovën. Zgjidhja do ofrohet përtej rezolutës 1244”.