Arben Kola lexon mesazhin e qytetarit, thirrje administratës: Dilni në shesh

Një mesazh i ardhur nga një qytetar është bërë publik sot në shesh nga aktivisti Arben Kola. Në dëshminë e tij, qytetari pretendon se është larguar nga puna për shkak të pjesëmarrjes në protesta dhe se kjo situatë i ka vështirësuar edhe përpjekjet për të gjetur një vend të ri pune.

“Kam dy muaj që kam dërguar CV-në dhe nuk më kanë kthyer përgjigje”, thuhet në mesazhin e lexuar nga Kola.

Sipas qytetarit, pas largimit nga puna edhe në sektorin privat, për shkak të angazhimit të tij në protesta, ai është përballur me vështirësi të mëtejshme në punësim.

Në fjalën e tij përpara qytetarëve, Kola iu drejtua edhe punonjësve të administratës, duke i bërë thirrje të bashkohen me protestat.

“Kam një thirrje për administratën. Dilni në shesh, sepse nëse jemi të gjithë bashkë, nuk kanë çfarë të na bëjnë. Dilni për fëmijët dhe të ardhmen, sepse nuk kemi Atdhe të dytë, kemi vetëm Shqipërinë”, u shpreh Kola.