Arrestohet 38-vjeçari në Tiranë, kapet me armë zjarri dhe municion në automjet

Një 38-vjeçar është arrestuar në Tiranë, pasi u kap duke qarkulluar me armë zjarri dhe municion në automjet.

Policia bëri me dije se arrestimi u krye në kuadër të operacionit të koduar “Gjurma”, të organizuar nga Komisariati i Policisë Nr. 2 në bashkëpunim me Forcën e Posaçme Operacionale Tiranë.

Sipas njoftimit zyrtar, shërbimet e Policisë kishin siguruar informacion në rrugë operative se një person po lëvizte i armatosur në kryeqytet. Pas organizimit të operacionit, automjeti i drejtuar nga 38-vjeçari me iniciale D. K., banues në Durrës, u lokalizua dhe u ndalua në rrugën “Perlat Rexhepi”.

Gjatë kontrollit të ushtruar në automjet, efektivët gjetën në çantën marsup të drejtuesit një armë zjarri pistoletë. Ndërkohë, poshtë sediljes së shoferit u zbuluan edhe 23 fishekë.

Arma dhe municioni u sekuestruan në cilësinë e provës materiale.

Në përfundim të veprimeve procedurale, 38-vjeçari u arrestua në flagrancë për veprën penale “Mbajtja pa leje e armëve, armëve shpërthyese dhe municionit”.

Materialet e çështjes i janë referuar Prokurorisë për vijimin e hetimeve dhe veprimeve të mëtejshme ligjore.