Arrestohet në Athinë i shumëkërkuari shqiptar, Hita jep detajet

Një shtetas shqiptar është arrestuar në Greqi në kuadër të një operacioni kundër trafikut të kokainës nga Kolumbia. Lajmin e ka bërë të ditur Drejtori i Përgjithshëm i Policisë së Shtetit, Skënder Hita.

Sipas Hitës, operacioni është zhvilluar në Athinë, ku autoritetet greke kanë sekuestruar një sasi kokaine dhe kanë arrestuar disa persona, mes tyre edhe shtetas shqiptarë.

Një prej shqiptarëve të arrestuar rezulton të jetë person i kërkuar nga autoritetet shqiptare. Sipas Policisë së Shtetit, ai është dënuar më herët për vrasje dhe konsiderohet person me rrezikshmëri të lartë.

Hita tha se Policia shqiptare ka shkëmbyer informacion në kohë reale me homologët grekë gjatë operacionit. Për shkak të natyrës konfidenciale të hetimit, ai nuk bëri të ditur identitetin e personit.

“Kemi pasur një shkëmbim në kohë reale të informacionit me homologët grekë”, tha Hita, duke shtuar se Policia shqiptare ka vijuar verifikimet dhe ka nisur hetimet për pjesën që lidhet me aktivitetin kriminal.