Arrestohet polici rrugor në Lezhë
Shërbimi për Çështjet e Brendshme dhe Ankesat, në Ministrinë e Punëve të Brendshme, ka arrestuar në flagrancë në orët e pasdites së sotme, punonjësin e Policisë së Qarkullimit Rrugor në Lezhë, Ylli Ulaj, për veprën penale të “Korrupsionit pasiv të punonjësve që ushtrojnë funksione publike”.
Arrestimi i punonjësit të policisë u bë pasi sot rreth orës 11:30 duke qenë me shërbim në autostradën Milot – Lezhë, dyshohet se i ka marrë 50 euro në formë ryshfeti një shtetasi nga Kosova, me iniciale S.D.
Ky i fundit po udhëtonte me automjetin e tij kur u ndalua për tejkalim të normave të shpejtësisë. Shtetasi nga Kosova ka kundërshtuar faktin se ishte në shkelje të rregullave të qarkullimit, por ka paguar sasinë e lekëve të kërkuar nga efektivi i Qarkullimit, Ylli Ulaj.
Punonjësi i policisë ka marrë 50 eurot dhe nuk ka proceduar administrativisht shtetasin kosovar, për shkeljen e konstatuar.
Shtetasi S.D. ka bërë më pas denoncim në numrin falas 0800 90 90 të Shërbimit për Çështjet e Brendshme dhe Ankesat, në Ministrinë e Punëve të Brendshme.
Menjëherë nisën hetimet dhe u arrestua në flagrancë punonjësi i policisë Inspektor Ylli Ulaj, dhe u sekuestruan në cilësinë e provës materiale 50 eurot e dhëna nga shtetasi kosovar.
Materialet hetimore iu referuan Prokurorisë pranë Shkallës së Parë të Rrethit Gjyqësor Lezhë, për veprën penale të “Korrupsionit pasiv të punonjësve që ushtrojnë funksione publike”.