Art publik me standarde profesionale, Gonxhja: Fund ndërhyrjeve amatore pa sens artistik

Qeveria ka firmosur udhëzimin për organizimin dhe funksionimin e Komisionit Shtetëror të Artit në Hapësirat Publike, duke vendosur rregulla të reja për mënyrën se si do të miratohen monumentet, memorialet, bustet, skulpturat, muralet dhe instalacionet artistike që do të vendosen në hapësirat publike. Sipas procedurës së re, çdo subjekt publik ose privat që propozon vendosjen e një vepre arti duhet të paraqesë fillimisht kërkesën pranë bashkisë përkatëse. Pas shqyrtimit të dokumentacionit, bashkia ia përcjell propozimin Ministrisë përgjegjëse për kulturën përmes Sekretariatit Teknik.

Më pas, Komisioni Shtetëror e vlerëson projektin në aspektin artistik, estetik, urbanistik dhe arkitektonik. Vetëm pas miratimit të Komisionit mund të vijojnë procedurat për vendosjen e veprës, ndërsa në të kundërt kërkesa refuzohet. Rregullat e reja do të zbatohen për të gjitha veprat e artit, pavarësisht nëse financohen nga shteti, bashkitë, subjektet private, donatorët apo partneritetet publike-private.

Lajmin e bëri të ditur ministri Blendi Gonxhja, i cili tha se udhëzimi vendos standarde profesionale dhe përgjegjësi konkrete për mënyrën se si veprat e artit bëhen pjesë e hapësirës publike. “Fund preferencave amatore dhe ndërhyrjeve pa sens artistik, urbanistik apo arkitektonik. Arti publik nuk mund të jetë më rezultat i improvizimit, nismave të rastësishme apo ndërhyrjeve pa kriter në hapësirat që i përkasin të gjithëve”, shkruan Gonxhja.

Sipas tij, hapësira publike nuk është një vend ku secili mund të vendosë çfarë të dojë, pasi ajo ndërton imazhin e qyteteve, ruan kujtesën dhe formëson identitetin e përbashkët. Të njëjtat standarde vlejnë për të gjithë, pavarësisht nëse një vepër financohet nga buxheti i shtetit, bashkitë, subjektet private, donatorët apo partneritetet publike-private. “Hapësira publike nuk është një hapësirë ku secili mund të vendosë çfarë të dojë. Ajo ndërton imazhin e qyteteve tona, ruan kujtesën dhe formëson identitetin tonë të përbashkët” shtoi ai.