Artur Shehu në kërkim nga SPAK, Rama: Projekti në Zvërnec nuk cenohet, toka i takon atyre që e kanë blerë

Kryeministri Edi Rama tregon se projekti në Zvërnec, nuk cenohet nga hetimet e SPAK për çështjen e pronësisë që ka nisur nga një prej pronarëve që zotëron pjesën më të madhe të tokës. I pyetur për urdhër-arrestin që Prokuroria e Posaçme ka lëshuar për Artur Shehun, i dyshuar për përfshirje në grupe kriminale të trafikut të drogës dhe pastrimit të parave, kryeministri u shpreh se toka në Zvërnec është tashmë në pronësi të investitorëve që e kanë blerë duke iu referuar procedurave ligjore.

“Toka nuk është më e askujt përveç se atyre që e kanë blerë pasur në titujt legjitimë të pronësisë siç janë në kadastër, hetimet për persona që janë edhe shitës janë hetimet që janë në rrugë paralele dhe SPAK bën punën e vet. Prona është e pronarëve që e kanë blerë.

Doli qartë në momentin kur transaksioni kaloi në një kontro të ngrirë të cilën subjekti në hetim nuk e aksesonin dot pa mbaruar hetimet, kjo është një gjë e mirë për ata që pretendojnë se prona është e tyre. Nëse do e provojnë këtë, lekët do i marrin ata dhe jo personi që ka bërë shitjen”, tha Rama.

Artur Sheshu ndodhet në Shtetet e Bashkuara të Amerikës prej vitesh ku dhe ka fituar azil politik. Ndaj tij është lëshuar masë sigurie, por nuk ekzekutuar. Ai dyshohet se ka pastruar paratë e ardhura nga aktiviteti i trafikut të drogës, kryer në kuadër të grupit të strukturuar kriminal.