Avokati i njohur vlerëson deputeten Sara Mila: Studente ekselente! I shokuar nga tymi që është hedhur ndaj saj

Avokati Edmond Petraj i ftuar në studion e A2CNN, për të analizuar politikën në vend është ndalur edhe tek deputetët e rinj, veçanërisht tek deputetja e Elbasanit, Sara Mila të cilën e ka vlerësuar jo vetëm si debatuese politike, por ka zbuluar se ajo ka qenë gjithashtu një studente ekselente. Më tej ai ka theksuar se është shokuar nga tymi i hedhur kundër saj pas zgjedhjeve parlamentare.

“Partia Socialiste nga ajo që unë kam parë ka disa persona të rinj, për shembull është diskutuar Sara Mila, një person i cili ka marrë shumë vota. Ajo ka qenë një studente ekselente, këtë ta them hapur. Unë jam shokuar nga gjithë ai tym që hidhej kundër saj. Ta kenë për nderë që ta kenë pranë, por jam habitur nga pjesa e vokabularit të cilin kishte ajo. Kishte një arkivë të tërë komunikimi dhe një marrëdhënie debati duke respektuar rregullat edhe të debatit në ato studio ku kam qenë unë.” – shtoi ai.

Duke u ndalur në zhvillimet e kampit opozitar avokati e paralelizon situatën duke kujtuar kohën kur Edi Rama ishte kandidat për kryetar të PS, ku edhe pse kishte ndërhyrje nga simpatizantë të Fatos Nanos, sërish u lejua të bënte fushatë, ndryshe nga PD që nuk lejoi as dorëzimin e dokumentacionit.

“Ndërkohë që kur Edi Rama ishte kandidat për kryetar të Partisë Socialiste dhe po shkonte në rrethe, kishte problematika nga simpatizantët fanatikë të Fatos Nanos, por Fatos Nano duke parë ato dy-tre problematika në Mallakastër apo Fier e të tjera, ku është volumi më i madh i socialistëve mbështetës, ndërhyri dhe e qetësoi situatën dhe e la Edi Ramën të bënte fushatë.” – tha Edmond Petraj.