Kandidati i PD-së në qarkun e Durrësit, Agim Baçi, thotë se kryeministri Rama po zhvillon një fushatë negativiste.
I ftuar në Ora News, Baçi thotë se pasi i kërcënon shqiptarët me jetë për vaksinat, i ka mbetur vetëm tu thotë që po erdhi në pushtet opozita nuk do të ketë më marrëdhënie seksuale në çift.
Baçi: PS ka qenë në opozitë këto vite si partitë e tjera. Rama ka zgjedhur një kastë personale që e ka quajtur Rilindje. Sot kemi një kastë drejtuesish kaq personale dhe kjo shpjegon dhe ligjërimin e zotit Ramës që kërcënon, vetëm shan, vetëm hakërrehet. Ka mbetur vetëm tu thotë shqiptarëve që nëse fiton opozita do të ndalohet dhe seksi pas 25 prillit, se vaksinat po, legalizimet po, rrogat po, ekonomia po. Ka mbetur tu thotë se nuk ka vetëm seks, familjet shqiptare do të vuajnë nga kjo gjë.
Ndryshe nga Rama, Baçi thotë se Basha nuk po merret me të por me programin dhe alternativën që ka për shqiptarët, si kryeministër i ardhshëm i tyre.
Baçi: Me sa kam ndjekur fushatën në terren, PD dhe Basha nuk është marrë me zotin Rama.Është një strategji shumë e mirë. Ai që e sheh vetëvetën si kryeministër të ardhshëm të shqiptarëve duhet ti shpjegojë atyre se çfarë do të bëhet me ekonominë. Ka shumë pyetje si do të gjenden paratë? Nëse kthehet shteti ligjor, llogaridhënia, shpirti publik për të debatuar gjërat që na duhen bashkërisht unë them se çdo gjë është e mundur.
Sipas Baçit, Rama po kërkon ndihmë për ta larguar në 25 prill me votë pasi do të dalë nga kthetrat e krimit që e ka marrë peng sipas tij.
Baçi: Rama duket sikur po na kërkon ndihmë ta votojmë për ta hequr nga pushteti që të shpëtojë nga kthetrat e atyre që e kanë marrë peng. Duket sikur e tërheqin.Edhe në qeverisjen e PD ka pasur gabime, as nuk do të vijnë ëngjëjt pas 25 prillit dhe do të marrin qeverinë e PD dhe do ta bëjnë parajsë por është e pafalshme të arrijmë në një stad të tillë që kryeministri të krenohet me të keqen, Rilindja të krenohet me të keqen.Kulturalisht po i ndryshon shqiptarët, po u thotë që po të jesh i ndershëm je i kotë, po të jesh i drejtë je budalla, po të jesh zbatues i ligjit je naiv. Prindërit shqiptarë janë në një siklet të paparë, nuk dinë si ti drejtojnë fëmijët.
Një parti, thotë Baçi, nuk duhet të vijë në pushtet duke premtuar punësime por me përpjekjen për të hapur vende të reja pune.
Baçi: Jo duke premtuar vende pune por me përpjekjen e saj për tu hapur vende pune, biznesi dhe gjithë shoqëria të kenë mundësinë e një tregu dhe kjo të krijojë vende pune. Jo të mbetet siç pretendon Rama që punëdhënësia më e madhe mbetet qeveria. Është trishtim i madh.
Në fund Baçi pati dhe një apel për zgjedhësit shqiptarë që të mos shesin dinjitetin e tyre.
Baçi: Po i çove njerëzit te mbijetesa ata do të shkojnë te shitja e votës. Ju bëj thirrje të gjithë qytetarëve shqiptarë që të mos e shesin votën se po shite votë ke shitur dinjitetin, të ardhmen tënde, i ke hequr të drejtën vetes me kërku llogari, me pas dinjitet.
Rasti “Becchetti”
Agim Baçi, thotë se humbja e gjyqit me sipërmarrësin italian Francesco Becchetti është provë sesi shteti funksionon në bazë të tekave të Ramës.
Duke bërë një krahasim edhe me Ora News ku ishte i ftuar, ai tha se të gjithë ata që kishin dyshime mbi presionin qeveritar ndaj këtij televizioni e kuptuan me rastin e Becchetti sesi qëndron raporti i qeverisë Rama me median e lirë.
Baçi: Edhe nëse ka pasur njerëz që kanë dyshuar se presioni i qeverisë ndaj Ora Neës nuk ka qenë i vërtetë duhet të shohë shembullin e Agon Channel për të kuptuar se cfarë alarmi ka media sot në Shqipëri me këtë kryeministër. Rasti i humbjes së gjyqit me Bechettin është rasti më tipik për të parë se shteti ka qenë vetëm një, ai që do Edi Rama. Mënyra si ka vepruar kryeministri, Erion Veliaj, Sekretari i Përgjithshëm i Kryeministrisë Agaçi, institucionet e tjera.
Ne kemi dijeni për aq sa kanë dalë po kur të zbardhen do të kuptojmë se është shembur ai slogan me të cilin Rama erdhi në pushtet se ne do të bëjmë shtet, por në ka fakt ka thënë shtet vetëm për Rilindjen dhe e ka mbajtur fjalën. Shtet për shqiptarët nuk ka bërë. Sot institucionet e drejtësisë ende nuk kanë dhënë asnjë sinjal që duhet të kishin nisur hetimin. Kemi të bëjmë me një vendim të formës së prerë gjyqësore.
Nëse Rama u përpëlit deri sot për tu mbushur mendjen shqiptarëve duke dalë në disa konferenca shtypi se nuk do të paguajmë asnjë lek, rezulton e kundërta, janë 120 mln euro, se ne themi 110 por do të paguajmë edhe shpenzimet e gjyqit, që fëmijët tanë do ti kenë borxh për tekat e një njeriu që nuk dëgjon për opozitë.
Duke analizuar frazën e shkëputur nga zbardhja e gjyqit se “nuk i bëhet opozitë shtetit”, Baçi shprehet.
Baçi: Ajo që lexuam nga zbardhja ishte se nuk i bëhet opozitë shtetit, çfarë do me thënë kjo? E kuptova këtë kur para ca kohësh përmendi idhullin e tij Enver Hoxhën që tha ka qenë kafshë politike. Kjo nënkupton se ka dashur të këndohet vetëm një këngë, kënga që do ai.Gjithë nëpunësit sot emitojnë kryeministrin, e shoh edhe në fushatë.Është një teknikë diktature. Në demokraci nuk mund të kemi imitim, imitim kemi pasur në komunizëm.