Norma bazë e interesit do të vijojë të jetë e pandryshueshme në nivelin 2.5%, pasi Banka e Shqipërisë ka vlerësuar se politika aktuale monetare mbetet e përshtatshme për të garantuar stabilitetin e çmimeve dhe mbështetjen e ekonomisë. Guvernatori Gent Sejko deklaroi se inflacioni u rrit në tremujorin e dytë të vitit, kryesisht si pasojë e shtrenjtimit të naftës në tregjet ndërkombëtare. Inflacioni mesatar për muajt prill-maj arriti në 2.9%, nga 2.5% në tremujorin e parë, por Banka e Shqipërisë vlerëson se kjo rritje do të jetë kalimtare.
Sejko tha se ekonomia shqiptare vijon të shfaqë ritme të qëndrueshme rritjeje. “Këshilli Mbikëqyrës vendosi të mbajë të pandryshuar normën bazë të interesit në nivelin 2.5%, pasi gjykon se qëndrimi aktual i politikës monetare mbetet i përshtatshëm. Inflacioni është rritur gjatë tremujorit të dytë, kryesisht si pasojë e rritjes së çmimeve të naftës në tregjet ndërkombëtare. Ne presim që kjo rritje të jetë kalimtare. Ekonomia shqiptare vijon të rritet me ritme solide dhe pranë potencialit të saj, e mbështetur nga konsumi, investimet private dhe eksportet”, tha Sejko.
Edhe tregu i punës paraqitet pozitiv. Punësimi në sektorin privat jobujqësor u rrit me 2.2%, paga mesatare me 11.5%, ndërsa norma e papunësisë mbeti në 8.4%. Banka e Shqipërisë evidenton gjithashtu se kreditimi i sektorit privat vazhdon të zgjerohet me ritme të larta. Sejko bëri të ditur se në muajin maj, portofoli i kredisë u rrit me 13.8% në terma vjetorë, duke mbështetur investimet e bizneseve dhe blerjen e banesave nga familjet.
“Kushtet financiare mbeten stimuluese. Kreditimi i sektorit privat po rritet me ritme të shpejta, ndërsa sektori bankar paraqitet solid dhe rezistent”. Banka paralajmëron se rritja e çmimeve të naftës dhe tensionet gjeopolitike mbeten burimet kryesore të rrezikut. “Balanca e rreziqeve mbetet në kahun e sipërm për inflacionin dhe në kahun e poshtëm për rritjen ekonomike, për shkak të pasigurive gjeopolitike dhe luhatjeve të çmimeve të naftës. Banka e Shqipërisë do të monitorojë me kujdes zhvillimet ekonomike dhe mbetet e gatshme të reagojë në kohën, kahun dhe me forcën e duhur për të garantuar stabilitetin e çmimeve”, tha Guvernatori.