Banorët e Dimalit dalin sërish në protestë: Bashkia nuk duhet të preket

Banorët e Bashkisë Dimal kanë dalë sërish në protestë kundër reformës territoriale të propozuar nga qeveria, e cila parashikon shkrirjen e kësaj bashkie dhe bashkimin e saj me Beratin. Nën sloganin “Dimali mbetet Dimal. Zëri i qytetarëve duhet të dëgjohet”, qytetarët kanë kundërshtuar fort prekjen e kufijve administrativë të bashkisë, duke kërkuar që qeveria të tërhiqet nga kjo nismë.

Banorët argumentojnë se Dimali mbart një histori të hershme, që daton që prej shekullit V para Krishtit, ndërsa sot përfaqëson një zonë me tradita, potencial ekonomik dhe një sektor të rëndësishëm bujqësor. Një prej argumenteve të tyre lidhet edhe me emërtimin e bashkisë. Ata kujtojnë se në vitin 2015, me vendimin nr. 34 të Kuvendit të Shqipërisë, emri i Bashkisë Ura Vajgurore u ndryshua në Dimal.

Sipas banorëve, bashkimi me Bashkinë Berat mund të sjellë pasoja në ofrimin e shërbimeve për qytetarët dhe të ndikojë negativisht në zhvillimin ekonomik të zonës. Ata theksojnë veçanërisht rëndësinë e bujqësisë dhe të serave në fshatra si Kutalli, Samaticë, Drenovicë, Cukalat dhe Goriçan, prodhimet e të cilave prej vitesh shkojnë edhe në tregjet ndërkombëtare. Kundër shkrirjes së Bashkisë Dimal është pozicionuar edhe Këshilli Bashkiak. Në një mbledhje emergjente, këshilltarët miratuan pavlefshmërinë e propozimit të qeverisë, duke argumentuar se relacioni i paraqitur nuk shoqërohet me fakte apo studime fizibiliteti që të justifikojnë avantazhet e bashkimit, në kundërshtim, sipas tyre, me kërkesat e nenit 89.

Nga 21 anëtarë që ka në total Këshilli Bashkiak Dimal, në mbledhje ishin të pranishëm 18 dhe të gjithë votuan pro mosshkrirjes së bashkisë. Protesta e banorëve dhe vendimi i Këshillit Bashkiak e vendosin tashmë kundërshtimin ndaj reformës territoriale në qendër të debatit lokal, ndërsa qytetarët kërkojnë që zëri i tyre të merret në konsideratë përpara çdo vendimi për të ardhmen administrative të Dimalit.