Banorët e Poliçanit kundër bashkimit me Beratin, thirrje Ramës: Vëri gishtin kokës

Banorët e Poliçanit kanë shprehur kundërshtim të fortë ndaj propozimit për bashkimin e Bashkisë Poliçan me Bashkinë e Beratit, gjatë dëgjesës publike të zhvilluar në kuadër të konsultimeve për reformën e re administrative-territoriale. Qytetarët e pranishëm e konsiderojnë këtë ndryshim një kërcënim për të ardhmen e qytetit, duke ngritur shqetësime për largimin e shërbimeve publike, përkeqësimin e arsimit dhe rrezikun e braktisjes së mëtejshme të zonës.

Një prej qytetareve e cilësoi reformën si “shfarosëse dhe denigruese”, duke iu referuar pasojave që solli reforma e mëparshme administrative në zonat rurale. Ajo kërkoi nga kryeministri të reflektojë dhe të marrë në konsideratë kundërshtimin e banorëve. “Ne nuk jemi marioneta, por do të luftojmë për të ardhmen e fëmijëve tanë. I them jo kësaj reforme denigruese”, u shpreh ajo.

Edhe një prind dhe trajner i të rinjve në Poliçan kërkoi që e ardhmja administrative e qytetit të vendoset nga vetë qytetarët përmes referendumit. “Unë nuk largohem nga vatani im, fëmijët e mi do t’i rris këtu. Politika duhet të na pyesë ne; të bëhet referendum dhe ta vendosim me votën tonë”, deklaroi ai.

Banorët deklaruan se do ta vijojnë kundërshtimin përmes mjeteve ligjore dhe institucionale, duke këmbëngulur që Poliçani të ruajë statusin e tij si bashki dhe që çdo vendim për të ardhmen e zonës të merret duke marrë parasysh vullnetin e komunitetit.