Kreu i grupit parlamentar të PD, Gazment Bardhi, ka reaguar për çështjen e Erion Veliajt, duke deklaruar se lirimi i kryebashkiakut nga Gjykata e Lartë do të ishte “funerali përfundimtar i Reformës në Drejtësi”. Bardhi u bëri thirrje partnerëve ndërkombëtarë të monitorojnë procesin, ndërsa akuzoi kryeministrin Edi Rama se po përpiqet të ndikojë te trupi gjykues për lirimin e Veliajt. Sipas Bardhit, Veliaj akuzohet nga SPAK për nëntë raste korrupsioni, pastrim parash, fshehje pasurie dhe shpërdorim detyre. “Drejtësia nuk mund të ketë një standard për qytetarët dhe një tjetër për njerëzit e pushtetit”, u shpreh ai.
Postimi i plotë
Nëse nesër Erion Veliaj del nga burgu, me vendim të Gjykatës së Lartë, ky do të jetë funerali përfundimtar i Reformës në Drejtësi. Erion Veliaj nuk është në burg për një akuzë të vetme, por për katër prej akuzave më të rënda që mund të rëndojnë mbi një zyrtar të lartë. SPAK e ka marrë të pandehur për 9 raste korrupsioni, të kryera në bashkëpunim, për pastrim parash, të kryer në bashkëpunim më shumë se një herë, për fshehje pasurie dhe shpërdorim detyre. Për nga pesha dhe numri i akuzave, Erion Veliaj konkurron sot vetëm me Belinda Ballukun.
I bëj thirrje partnerëve ndërkombëtarë të Shqipërisë të monitorojnë me vëmendje atë që po ndodh në Gjykatën e Lartë. Kryeministri Edi Rama po bën gjithçka për të ndikuar trupin gjykues dhe për të realizuar skenarin e nxjerrjes së Erion Veliajt nga burgu.
Partnerët tanë, që kanë investuar prej 10 vitesh në Reformën në Drejtësi, kanë rastin ta vlerësojnë atë që po ndodh në Gjykatën e Lartë si pjesë të standardit me të cilin matet lufta kundër korrupsionit të nivelit të lartë në Shqipëri.
I bëj thirrje gjyqtarëve të Gjykatës së Lartë, të qëndrojnë në lartësinë e detyrës dhe pritshmërive të qytetarëve shqiptar për drejtësi dhe luftë ndaj pandëshkueshmërisë. Nëse një person që akuzohet për 9 raste korrupsioni dhe 4 vepra penale, lihet i lirë, atëherë sistemi i paraburgimit nuk duhet të ekzistojë më në vend. Drejtësia nuk mund të ketë një standard për qytetarët dhe një tjetër, kur përballë saj janë njerëzit e pushtetit.