Basha: 25 vjet nga rrëzimi i bustit të Hoxhës, simbol i lirisë

“Për ne, 20 shkurti 1991, është simboli i lirisë”.

Kështu u shpreh sot kryetari i opozitës, Lulzim Basha, në Muzeun Kombëtar ku u zhvillua një aktivitet përkujtimor në kuadrin e 25-vjetorit të rrëzimit të shtatores së diktatorit Enver Hoxha në Tiranë, më 20 shkurt 1991.

“Ne sot jemi mbledhur të kujtojmë ngjarjen më kulmore të historisë, rrëzimin e shtatores së diktatorit. Sa herë kujtojmë përballjen madhështore të 20 shkurtit 1991, secilin nga ne e përshkojnë emocione, pasi shembja e shtatores së diktatorit ishte ora e frymëmarrjes së lirisë dhe e çlirimit të shqiptarëve nga tirania”, tha ai.

Sipas tij, rrëzimi i shtatores është ngjarja që i tregoi botës së Shqipëria ishte vendi më i izoluar në botë por njëherazi tregoi se ketu jetonte një rini e guximshme e etur për Shqipërinë si gjithë Europa.

“Nëse do të përfytyronin një panair të lirisë, Shqipëria do të prezantohej pikërisht me 20 shkurt 1991. Nderim për të gjithë ata që u derdhën në shesh atë ditë. Njerëz që historia i mbanë në hije, por pa të cilët nuk mund të kishte fitore, ne i nderojmë studentët, sindikalistë dhe qytetaret që u bënë pjesë e kësaj dite historike”, cilësoi Basha.

Duke shtuar se qeveria e sotme e injoroi këtë ditë të madhe dhe nuk organizoi asnjë ceremoni përkujtimore.

“Si është e mundur një heshtje nga qeveria, kjo është e turpshme, provokuese dhe ogurzezë. Atyre nuk u bën zemra nuk mund të lartësojnë vlerat qytetare. Këtë 25-vjetor më lejoni t’u drejtohemi qytetarëve shqiptarë që ta bëjmë 20 shkurtin emblemën e lidhjeve tona për liri”, tha  kryetari i opozites .