Reali dramatike në “frymën e fundit” ndaj Celta Vigos

Real Madrid rrëmben një fitore dramatike 2-1 ndaj Celta Vigo në javën e 27-të të La Liga, në ndeshjen e zhvilluar në stadiumin Estadio Municipal de Balaídos.

Skuadra madrilene kaloi në avantazh falë golit të Aurélien Tchouaméni. Pas një goditjeje nga këndi, topi shkoi te Arda Güler, i cili asistoi për Tchouaménin, ndërsa mesfushori francez realizoi me një goditje të fuqishme në rrjetë.

Reagimi i vendasve erdhi në minutën e 24-të, kur Celta Vigo barazoi shifrat me golin e Borja Iglesias. Pas një aksioni të ndërtuar nga një top i gjatë drejt Hugo Veiga, ky i fundit depërtoi në zonë dhe pasoi në tokë për Iglesias, i cili shënoi me një goditje të saktë.

Kur gjithçka dukej se po shkonte drejt barazimit, Real Madrid gjeti golin e fitores në minutën 90+5. Federico Valverde goditi drejt portës dhe topi u devijua nga një lojtar i Celta Vigos, duke mashtruar portierin dhe duke përfunduar në rrjetë. Pas kësaj fitoreje, Real Madrid e çon totalin në 63 pikë dhe mbetet përkohësisht vetëm një pikë pas Barcelonës në garën për titull.