”Bashkitë kërkojnë fuqi reale”, kryebashkiaku Pjerin Ndreu: Shërbimet përmirësohen me kompetenca, jo me kufij

Kryebashkiaku i Lezhës, Pjerin Ndreu, ka reaguar në lidhje me debatin për reformën territoriale, duke argumentuar se diskutimi publik është përqendruar në çështjen e kufijve administrativë, ndërsa sipas tij problemi thelbësor lidhet me kompetencat e pushtetit vendor. Në një reagim publik, Ndreu thekson se ndryshimi i kufijve administrativë nuk është qëllimi i reformës dhe nuk ndikon drejtpërdrejt në jetën e qytetarëve. Sipas tij, territori nuk zhduket, administrata dhe përfaqësimi i qytetarëve mbeten të garantuara, ndërsa kufijtë përbëjnë vetëm një instrument administrativ.

Reagimi i plotë

Debati për reformën territoriale po rrëshqet në drejtimin e gabuar. Flitet pa fund se po shkrihet kjo Bashki, po humbet ai territor, po preken kufijtë. Por a është vërtet ky problemi? Territori nuk zhduket. Banorët mbeten aty, administrata do të jetë aty ku duhet të jetë dhe përfaqësimi në këshillat bashkiakë garantohet sipas popullsisë.

Kufijtë janë vetëm një instrument administrativ, jo qëllimi i reformës. Pyetja që duhet të na shqetësojë është tjetër, çfarë kompetencash do të kenë bashkitë? Nëse pushteti, fondet dhe vendimmarrja vazhdojnë të mbeten në qendër, atëherë çfarë ndryshon për qytetarin? Shërbimet nuk përmirësohen duke vizatuar një hartë të re. Përmirësohen kur bashkitë kanë kompetenca reale, burime financiare dhe liri për të vendosur.

Prandaj debati duhet të jetë për decentralizimin, jo për kilometrat katrorë. Më lind edhe një pyetje, kujt i intereson që diskutimi të mbetet te kufijtë dhe jo te kompetencat? Sepse sa më shumë flasim për hartën, aq më pak flasim për transferimin e pushtetit nga qeveria qendrore te pushteti vendor. Në konsultimet publike dëgjova shumë akuza, shumë slogane dhe shumë zhurmë. Shumë pak propozime konkrete.

Qeveria mund të kritikohet sa të duash, por kritika ka vlerë vetëm kur shoqërohet me alternativa. Nëse mendon se reforma është e gabuar, thuaj çfarë duhet bërë ndryshe. Thuaj cilat kompetenca duhet t’u kalojnë bashkive, si duhet të financohen, si do të përmirësohen shërbimet për qytetarët. Sepse në fund të ditës, qytetari nuk pyet ku kalon kufiri administrativ. Pyet nëse ka ujë, rrugë, pastrim, transport, shkolla dhe shërbime cilësore. Kjo është reforma që ka rëndësi. Të tjerat janë, në rastin më të mirë, një shpërqendrim i debatit.