Bashkohen deputetët, Kuvendi miraton me 114 vota pro pr.rezolutën e përbashkët për Integrimin

Deputetët nga PS dhe PD janë bashkuar, pasi Kuvendi ka miratuar me 114 vota pro pr.rezuoltutën e përbashkët. I vetmi deputet që ka abstenuar ishte Bujar Leskaj. Teksti përcakton angazhimet politike dhe institucionale të Shqipërisë në rrugën drejt BE-së duke kërkuar një rol më aktiv të Kuvendit, veçanërisht në mbikëqyrjen e rolit të qeverisë. ‘‘Historia s’do mbajë mend debatet tona, konfliktet tona të vogla, por do mbajnë mend nëse i iu përgjigjëm sfidës së kohës”, tha deputetja e PS-së, Romina Kuko.

Një nga pikat kyçe të rezolutës është angazhimi reciprok mes mazhorancës dhe opozitës për integrimin dhe forcimin e dialogut politik, një sinjal që synon të përcillet edhe te partnerët evropianë. Dokumeni mori votat e të dyja palëve në komisionin e jashtëm, për t’ia lënë parlamentit aktin e fundit.

“Mazhoranca angazhohet të sigurojë kushtet për pjesëmarrjen e plotë të opozitës në veprimtarinë parlamentare, të respektojë kërkesat e saj në përputhje me standardet demokratike, me Kushtetutën dhe Rregulloren e Kuvendit. Opozita angazhohet të sigurojë pjesëmarrje të plotë në veprimtarinë parlamentare në përputhje me standardet demokratike, me Kushtetutën dhe Rregulloren e Kuvendit. Të dyja palët angazhohen për forcimin e dialogut politik”, tha deputeti i PS, Igli Hasani.

Zv/kryetarja e komisionit të Jashtëm, Albana Vokshi e cilësoi rezolutën e dakordësuar si një produkt kryesisht të opozitës. ”Ky variant, kjo draftrezolutë është mbi 90% kontribut i opozitës. Ja çfarë do të thotë kur opozita nuk përjashtohet. Ja produkti kur opozitës i jepet vendi dhe i lejohet kontrbuti, rezolutë në formë shumë serioze dhe përmenden të gjitha problematikat që raporti i qeverisë nuk i përmend. Ne kemi dalë përtej raportit që ka sjellë qeveria”, tha Vokshi.

Rezoluta e përbashkët PS-PD për integrimin ia doli të arrijë konsensusin mes palëve duke bërë që të mbajnë të njëjtin qëndrim lidhur me procesin e anëtarësimit në BE. Edhe pse opozita është shprehur për bllokim të negociatave për shkak të IBAR dhe mazhoranca ka kundërshtuar, një grup pune ia ka dalë të gjejë gjuhën për të hartuar rezolutën. Nga grupi i PS-së merita i takon Romina Kukos, Erion Malajt, kurse tek opozita janë: Edmond Haxhinasto, Ilda Zhulali dhe Albana Vokshi.