BBC: Njëmbëdhjetë të vdekur pasi një aeroplan që transportonte parashutistë u rrëzua në Francën lindore

Njëmbëdhjetë persona kanë vdekur pasi një avion civil që transportonte parashutistë u rrëzua në qytetin Tomblaine në Francën lindore, thanë autoritetet lokale.

Piloti dhe 10 pasagjerë vdiqën në incident, përfshirë pesë studentë dhe pesë instruktorë, sipas zyrtarëve lokalë.

Aeroplani, i cili po përdorej nga një shkollë parashutistësh, ishte ngritur nga aeroporti Nancy-Essey kur u rrëzua, raportuan mediat lokale.

Policia u ka bërë thirrje publikut të shmangë zonën përreth aeroportit në departamentin Meurthe-et-Moselle.

Ministri francez i transportit, Philippe Tabarot, tha se ai dhe ministri i brendshëm Laurent Nunez po udhëtonin drejt vendit të aksidentit, të cilin e quajti një “tragjedi të tmerrshme”.

Yves Seguy, prefekti i departamentit lindor të Meurthe-et-Moselle, tha se asnjë kalimtar nuk u lëndua në incident, sipas agjencisë së lajmeve AFP.

Aksidenti ndodhi në një zonë të mbushur me njerëz pranë një qendre tregtare, raporton AFP.

“Aeroplani ra pothuajse vertikalisht, në afërsi të një kompleksi banesash, në buzë të aeroportit”, tha Seguy për transmetuesin francez BFM, duke shtuar se ishte me fat që nuk pati viktima të tjera.

Gjysma e parashutistëve që vdiqën ishin infermierë, tha për BFM Thierry Pechey, president i degës Meurthe-et-Moselle të Urdhrit të Infermierëve të Pavarur.

Zyrtarët lokalë thanë gjithashtu se të afërmit e viktimave ishin të pranishëm në aeroport kur ndodhi rrëzimi.

AV/KJ