Belind Këlliçi: Videoja nga Diaspora kundër protestës është e sajuar, Rama po nxit përçarje

Deputeti i PD, Belind Këlliçi, ka reaguar lidhur me një video që sipas tij po shpërndahet nga deputetë dhe kryetarë bashkish të Partisë Socialiste, me qëllim kundërshtimin e protestës së zhvilluar në Tiranë. Përmes një deklarate publike, Këlliçi e cilësoi videon si “të sajuar, të sforcuar dhe banale”, duke pretenduar se në të paraqiten persona që hiqen si pjesëtarë të diasporës për të përcjellë një mesazh kundër protestuesve. Sipas tij, përpjekja për t’iu kundërvënë protestës përmes materialeve të tilla synon të krijojë përçarje mes shqiptarëve. Këlliçi akuzoi kryeministrin Edi Rama dhe drejtues të Partisë Socialiste se po përpiqen të minimizojnë pakënaqësinë qytetare ndaj qeverisë.

Postimi i plotë

Deputetë dhe kryetarë bashkie të Edi Ramës kanë marrë porosi të shpërndajnë një video ku nxjerrin disa punëtorë që hiqen si të diasporës, si mesazh kundër protestës në Tiranë! Jo vetëm videoja është e turpshme, e sajuar, e sforcuar, groteske dhe banale, por sidomos akti, përpjekja perverse e Edi Ramës (përmes Taulant Ballës), për t’iu kundërvënë atyre që kanë pushtuar sheshet, duke nxitur kështu përçarje, është skandaloz. Asnjë video e sajuar nuk e sfumon atë që po ndodh.

Nuk kemi të bëjmë me një debat ku disa mendojnë ndryshe nga të tjerët. As me përplasje idesh. Kemi të bëjmë me një popull të tërë që është ngritur në revoltë kundër korrupsionit dhe arrogancës 13 vjeçare.

Këto reagime perverse që synojnë konflikt, janë përpëlitjet e një Kryeministri të zhytur në afera i cili ka frikë nga drejtësia, nga fati që e pret. Përpjekje djallëzore, sikur ai ka diasporën e tij, ndërkohë që bashkëqytetarët tanë që janë ngritur kundër Ramës kanë tundur qytetet e Europës. Në të vërtetë, kreut të organizatës i kanë ngelur vetëm pak njerëz, në parti e në ekrane, të cilët vijojnë të këndojnë këngën e tij, duke u bërë sakaq edhe ata njësoj të urryer në sytë e mbarë shqiptarëve.