Benet Beci: I jam falenderues z. Rama për besimin që mu dha për të qenë koordinator politik i PS për Qarkun e Shkodrës

Kryebashkiaku i Shkodrës, Benet Beci ka reaguar përmes një postimi në rrjetet sociale për mundësinë dhe besimin që Rama i dha atij për të qenë koordinator politik i Partisë Socialiste për Qarkun e Shkodrës.
“Janë emocione të përziera këto të sotmet kur Kryeministri, z. Edi Rama, sapo më ngarkoi me një detyrë të rëndësishme, sfiduese e krejt të re për profilin tim.
Jam thellësisht falderuesën për mundësinë dhe besimin për të qenë koordinator politik i Partisë Socialiste për Qarkun e Shkodrës
pa diskutim ndaj z. Rama, por veçanërisht ndaj qytetarëve të Shkodrës e bashkëpunëtorëve të mi. Falë jush, rrugëtimi ynë i përbashkët në politikë prej prillit 2021 po rezulton i duhuri.
Ndihem gjithashtu i shpërblyer për modelin tonë të të bërit politikë.
Duke u fokusuar te puna dhe pozitiviteti, te aftësitë dhe vullneti për ta zhvilluar rajonin tonë, duket se po sjellim bashkë mundësi të reja. Falenderues për çdo antëtar të partisë e drejtues të saj, me të cilët kemi arritur fitoret e deritanishme, si dhe për drejtuesen Elisa Spiropali, të cilës i uroj suksese, tashmë në bashkëdrejtimin për qarkun e Tiranës.
Por sot ndihem edhe i sfiduar, si dikush që merr përsipër për herë të parë përgjegjësi, në një fushë ku përpara kanë kontribuar njerëz me përvojë më të gjatë.
Me shumë dëshirë, motivim dhe besim do t’i kushtohem edhe kësaj detyre, për të dhënë maksimumin në një rrugë tashmë të pakthim, atë të zhvillimit për Shkodrën si bashki e si qark.
Kam nevojë për mbështetjen e çdo anëtari të partisë, çdo kontribuesi në vite e çdo qytetari në qarkun tonë.
Nuk do të jetë e lehtë, por kjo e jona duhet dhe do të jetë rruga drejt zhvillimit pa kthim, siç Shkodra e meriton.
Ne duhet e do të jemi të gjithë bashkë sepse Shkodra është e para.” shkruan Beci në postimin e tij.