Berat/ 15-vjeçari mbytet në lumë teksa punonte me të atin në arë

Një ngjarje e rëndë është regjistruar këtë të diel në fshatin Orizaj, në Bashkinë e Beratit.

Sipas informacioneve paraprake, një 15-vjeçar, i cili po punonte në arë së bashku me të atin, ka hyrë në lumë për t’u freskuar dhe për t’u larë. Gjatë kohës që ndodhej në ujë, ai dyshohet se është marrë nga rrjedha e lumit.

Babai i të miturit ka hyrë menjëherë në ujë në përpjekje për ta shpëtuar dhe ka arritur ta nxjerrë në breg, por fatkeqësisht djali ishte pa shenja jete.

Në vendngjarje kanë mbërritur efektivët e policisë dhe shërbimi i urgjencës, i cili e ka transportuar trupin e pajetë drejt morgut të Spitalit Rajonal të Beratit, ku do t’i nënshtrohet autopsisë mjeko-ligjore.

Grupi hetimor vijon punën për zbardhjen e plotë të rrethanave të ngjarjes dhe përcaktimin e shkakut të saktë të vdekjes. Paraprakisht, dyshohet se bëhet fjalë për një mbytje aksidentale.