Berisha: Kryeministri presion SPAK-ut që të arrestojnë Sali Berishën

Ish-kryeministri Berisha sot në një konferencë shtypi foli për Kongresin e PS, ku ndër të tjera e akuzoi se Edi Rama u mor me hallet e tij, por jo të qytetarëve.

Ish-kryeministri theksoi se “Edi Rama po bën presion SPAK-ut që arrestoni Sali Berishën”. Sipas ish-kryeministrit, Edi Rama është frikësuar nga ringritja e PD, ndaj po kërkon nga SPAK-u që ta ndihmojë në hallin që e ka kapur nga frika e protestave popullore.

Në Kongresin e fundit të PS, ishte kryeministri Rama që iu drejtuar personalisht SPAK-ut që të hetojë dhe penalizojë Berishën.

Berisha tha në vijim: “Ata që kanë pasur ndonjë vërejtje apo dyshim se po abuzohet duke e quajtur SPAK-un, si SPAK i partisë, u gjetën në mënyrë të zhgënjyer. Në mënyrë të përsëritur, Edi Rama, kreu i organizatës, u deklaroi shqiptarëve se SPAK është vepër i PS, është fëmija e saj, pjellë e saj dhe këtë duhet ta dijë Shqipëria dhe bota.

Në diktaturë, ju nuk keni jetuar, por institucionet si prokuroria, gjykatat, policia, ushtria, quheshin armë të partisë. Ekzakt kjo që u them unë. Armë në duart e partisë. Armë në duart e diktaturës së proletariatit. Këtë herë nuk është më diktaturë e proletariatit. Këtë herë flitet për armë të PS apo të narkoshtetit.

Kreu i organizatës kriminale ngarkoi me detyrë SPAK-un e partisë duke i thënë që e dua Sali Berishën në burg dhe në djall opozitën. Në historinë 30-vjeçare të këtij vendi, kuvende të tilla edhe Partia e Punës ka zhvilluar, por jo kaq të paskrupullt, kaq të hapura, nuk bëheshin”.

Ndërkohë mësohet se në SPAK ka dy dosje hetimore ku del emri i Berishës.