Berisha mobilizon degët kundër projektit për shkrirjen e 15 bashkive: Forconi frontin opozitar

Nisma e Partisë Socialiste për reduktimin e numrit të bashkive nga 61 në 46 ka nxitur reagimin e Partisë Demokratike, e cila ka nisur organizimin e strukturave të saj në të gjithë vendin.

Përmes një shkrese të firmosur nga sekretari Organizativ, Klevis Balliu, dhe përgjegjësi për pushtetin vendor, Ylli Asllani, degëve të PD-së u kërkohet të mblidhen me urgjencë për të koordinuar kundërshtimin ndaj projektit. Dokumenti parashikon zhvillimin e takimeve me qytetarët, me synim informimin dhe sensibilizimin e tyre për pasojat që, sipas demokratëve, sjell reforma.

Paralelisht me aktivitetet në terren, selia blu njofton se do të zhvillojë edhe një fushatë mediatike kundër projektligjit. Në dokument theksohet gjithashtu se këshilltarët bashkiakë të PD-së duhet të kërkojnë bashkëpunim me përfaqësues të forcave të tjera politike që ndajnë të njëjtin qëndrim kundër shkrirjes së bashkive. Prioritet duhet të jetë mbrojtja e interesave të komuniteteve lokale.

Partia Demokratike e cilëson reformën territoriale si një proces që dëmton organizimin vendor dhe krijon përçarje. Megjithatë, nuk parashikohet organizimi i protestave nga qendra e partisë. Në vend të kësaj, degët lokale udhëzohen të mbështesin çdo protestë qytetare që mund të zhvillohet në zonat e tyre.

Debati për reformën territoriale është zhvilluar edhe në Komisionin e Posaçëm Parlamentar PS-PD, por pa arritur në një konsensus mes palëve. Partia Socialiste vijoi me nismën ligjore, duke depozituar në Kuvend projektligjin e mbështetur nga 10 deputetë, i cili synon uljen e numrit të bashkive nga 61 në 46.