Berisha në Amerikë, takim me kongresmenin Joe Wilson: Në fokus droga, zgjedhjet dhe qeveria teknike

Kreu i PD-së, Sali Berisha, në vijim të takimeve në Amerikë, tregon se ka zhvilluar një takim me kongresmenin Joe Wilson, kryetar i Komisionit të Helsinkit të Kongresit amerikan, ku ishte i shoqëruar nga kreu i Partisë Republikane, Fatmir Mediu.

Sipas Berishës, në fokus të bisedës ishin trafiku i drogës, krimi i organizuar, korrupsioni, zgjedhjet dhe gjendja e të drejtave të opozitës në Shqipëri.

Berisha akuzoi qeverinë Rama për përdorimin e parave të drogës dhe institucioneve shtetërore për kontrollin e pushtetit dhe manipulimin e zgjedhjeve. Ai ngriti gjithashtu nevojën për një qeveri teknike dhe denoncoi, sipas tij, ndërhyrjen politike në drejtësi.

Kreu i PD-së nënvizon se gjatë takimit u diskutuan edhe qëndrimet e Presidentit Donald Trump dhe Sekretarit të Shtetit Marco Rubio për luftën kundër trafikut dhe karteleve të drogës.

Postimi i plotë

Takim me Kongresmenin Joe Wilson, kryetar i Komisionit te Helsinkit të kongresit të SHBA: Diskutuam, mbi pasojat e narkoshtetit dhe farsës zgjedhore nevoja për qeveri teknike në Shqipëri dhe gjendjen e të drejtave të njeriut në Shqipëri. Gjatë vizitës në Shtetet e Bashkuara të Amerikës, i shoqëruar nga Kryetari i Partisë Republikane të Shqipërisë, Fatmir Mediu, pata kënaqësinë të zhvilloja një takim të rëndësishëm me kryetarin e Komisionit të Helsinikit të Kongresit të SHBA. Diskutimi ynë u përqendrua në problemet madhore me të cilat përballet Shqipëria, kryesisht trafiku i drogës dhe narkoshteti, korrupsionin galopant qeveritar dhe ndikimi i tyre i drejtpërdrejtë në shndërrimin e zgjedhjeve në farsë zgjedhore. Lufta ndaj karteleve të drogës dhe ndikimi te zgjedhjet u trajtuan gjerësisht në këtë takim.

Gjatë takimit u vu theksi te qëndrimet e shprehura nga Presidenti Donald Trump dhe Sekretari i Shtetit Marco Rubio, sipas të cilëve partneriteti strategjik me Shqipërinë synon në radhë të parë luftën pa kompromis ndaj trafikut dhe karteleve të drogës janë një shpresë për shqiptaret. U denoncua fakti se krimi i organizuar dhe paratë e drogës të lidhura me nivelet më të larta të qeverisjes po përdoren nga administrata dhe qeveria e sotme e Edi Ramës për të manipuluar zgjedhjet, për të kontrolluar pushtetin dhe për të pastruar paratë e drogës.

E njohëm kongresmenin amerikan me situatën jashtëzakonisht të vështirë ku ndodhet vendi. Kryeministri Rama ka shkatërruar Kushtetutën dhe të gjitha institucionet e pavarura, duke përqendruar në duart e tij një pushtet absolut që prodhon korrupsion absolut. Po ashtu, ngritëm shqetësimin se të drejtat e opozitës në Parlament shkelen dhe nuk respektohen.

Kryeministri kontrollon plotësisht drejtësinë dhe e përdor atë si armë politike kundër opozitës me qëllim mbajtjen e pushtetit. Ai refuzoi t’i heq imunitetin zv/kryeministres Balluku duke i bllokuar kështu haptas drejtesinë dhe luftën kundër korrupsionit. Në këtë takim e falenderuam Kongresmenin Joe Wilson për interesin e tij për gjendjen në Shqipëri dhe qëndrimet e tij të lidhura me zhvillimet në rajon.