Berisha përshëndet marrëveshjen e partive shqiptare në Luginën e Preshevës

Kryetari i Partisë Demokratike, Sali Berisha, ka përshëndetur marrëveshjen e arritur mes subjekteve politike shqiptare të Preshevës, Bujanocit dhe Medvegjës për të garuar me një listë të përbashkët në zgjedhjet parlamentare të Serbisë. Në një reagim në rrjetet sociale, Berisha e cilëson marrëveshjen si një zhvillim për t’u përshëndetur dhe shprehet se ajo është në interes të shqiptarëve që jetojnë në këto komuna.

“Partia Demokratike përshëndet këtë marrëveshje që është dhe interesi më i mirë i shqiptarëve në këto komuna të Serbisë”, shkruan Berisha. Ai u bën thirrje shqiptarëve që jetojnë në Preshevë, Bujanoc dhe Medvegjë, si dhe atyre në emigracion, të marrin pjesë në zgjedhje, duke nënvizuar rëndësinë e përfaqësimit politik të komunitetit shqiptar.

“Partia Demokratike u bën thirrje të gjithë shqiptarëve rezidentë në këto komuna apo në emigracion të marrin pjesë në këto zgjedhje për të siguruar përfaqësimin më të mirë të mundshëm të shqiptarëve të komunave të tyre”, shprehet Berisha.

Në reagimin e tij, kryetari i PD-së i referohet gjithashtu marrëveshjes së arritur mes forcave politike shqiptare për pjesëmarrje me një listë të përbashkët, të emërtuar “Koalicioni Shqiptar”, në zgjedhjet e parakohshme parlamentare të Serbisë.

Berisha e cilëson komunitetin shqiptar në këto komuna si të përballur me vështirësi të mëdha dhe e lidh pjesëmarrjen në zgjedhje me synimin për një përfaqësim sa më të mirë politik.