Bie zjarr, flakët afrohen pranë bizneseve në zonën turistike të Shëngjinit

Një zjarr ka përfshirë këtë të premte masivin me pisha në zonën e Ranës së Hedhur në Shëngjin, duke shkaktuar shqetësim për shkak të afërsisë me bizneset që operojnë në këtë zonë turistike.

Në vendngjarje kanë mbërritur forcat zjarrfikëse dhe shërbimet e tjera emergjente, të cilat po punojnë për të izoluar flakët dhe për të shmangur përhapjen e tyre në sipërfaqe të tjera.

Fokusi kryesor i ndërhyrjes është mbrojtja e pyllit me pisha, por e bizneseve dhe objekteve që ndodhen pranë vatrës së zjarrit. Shkaqet e zjarrit nuk dihen ende, ndërsa operacioni për shuarjen e plotë të flakëve vijon. Autoritetet po monitorojnë situatën për të shmangur çdo rrezik të mëtejshëm.