Bizneset në Tiranë ulin qepenat, thirrje protestuesve: Jemi me ju, mos na dëmtoni

Protestat studentore në Tiranë, prej 3 ditësh janë shoqëruar me dëme të konsiderueshme në disa biznese, duke lënë pas pasoja për tregtarët dhe pronarët e subjekteve që ushtrojnë aktivitetin e tyre në zonat ku u zhvilluan tensionet.

Në terren vërehen biznese që kanë mbyllur qepenat, ndërsa në dyert e tyre janë vendosur letra me mesazhe drejtuar protestuesve. “Jemi me ju, mos na dëmtoni biznesin”, shkruhet në njoftimet e vendosura nga disa prej tyre.

Përmes këtij mesazhi, bizneset shprehin mbështetjen e tyre për qytetarët dhe të drejtën e tyre për të protestuar, por njëkohësisht kërkojnë që aktiviteti ekonomik të mos bëhet pjesë e dëmeve që mund të shkaktohen gjatë tubimeve.

Dëmet e shkaktuara kanë ndikuar në funksionimin e disa prej subjekteve tregtare, ndërsa mbyllja e qepenave dhe mesazhet e vendosura në dyer pasqyrojnë shqetësimin e pronarëve për pasojat që protesta mund të ketë në punën dhe të ardhurat e tyre.