Bysheku në Elbasan mori ngjyrat e festës, duke mirëpritur qindra qytetarë, të apasionuar pas natyrës, vizitorë vendas dhe turistë të huaj, të cilët zgjodhën ta kalojnë të djelën mes gjelbërimit, muzikës, traditës dhe bukurive të zones, dhe piknikut.
Aktiviteti, i organizuar nën kujdesin e Kryetarit të Bashkisë Elbasan, Gledian Llatja, solli një atmosferë të veçantë në Byshek, me muzikë live, DJ, grup kërcimi, panair dhe momente argëtimi për të gjitha moshat.
Në fjalën e tij, Kryetari Gledian Llatja u shpreh se Bysheku është një nga pasuritë turistike të Elbasanit dhe se Bashkia do të vijojë ta promovojë e zhvillojë këtë zonë, duke investuar në turizëm dhe duke krijuar më shumë mundësi për komunitetin dhe ekonominë lokale.
Panairi i artizanatit dhe produkteve tradicionale i dha një tjetër dimension festës, duke sjellë në vëmendje punën, krijimtarinë dhe traditën e zonës, ndërsa natyra e Byshekut u kthye në skenën më të bukur të kësaj dite.
Për elbasanllinjtë, Bysheku ka qenë prej dekadash një nga destinacionet më të preferuara për fundjavën. Sot, kjo traditë vijon, ndërsa Bysheku po fiton gjithnjë e më shumë vëmendje edhe si një destinacion për vizitorët dhe turistët.
Një ditë feste, por edhe një tjetër dëshmi e potencialit të madh turistik të Elbasanit, ku natyra, tradita dhe mikpritja bëhen bashkë për të krijuar një eksperiencë të paharrueshme.
Bysheku feston sot, mes njerëzve, muzikës, traditës dhe natyrës!
